眼鏡被視為配飾的一部份，有人以款行先，大走潮流路線，有人選擇功能為主，實事求是。無論你是哪一類人，舒服才是選擇眼鏡的大前提，現時的眼鏡又輕又體貼，除了有迎合亞洲人扁鼻樑的專用鏡框外，更有削減手機電磁波的納米眼鏡，功能愈來愈多元化。
記者：區佩嫦 攝影：梁細權、陳智良 模特兒：蚊（d8）、Kendy
納米架抗手機電磁波
納米技術已被廣泛使用，這副康特納米鏡框便以此技術來對抗手機的電磁波。鏡框的鼻托及臂位末端，鑲有可削減手機電磁波的特製晶片，可減少通話時電磁波對眼及腦部的影響。鏡框還根據中醫穴位療法及能量醫療法而設計，以達提神醒腦之效，夠晒神奇。
售價：$790（a）
機械人測電磁波
呢個機械人，可測試戴納米眼鏡前後的電磁波度數有幾多？睇睇副眼鏡Work唔Work。
戴眼鏡前：電磁波超標
未戴納米鏡架前，電磁波的度數有30.66度，最高更達32度，機械人前額盞紅燈重不停咁閃，證明電磁波勁到爆晒燈。
戴眼鏡後：度數下降
戴咗眼鏡後，電磁波度數只有18.27度，幅度則維持在15至19度，度數大降。
電磁波未知有乜影響
一直都聽到啲人話手機電磁波影響腦部，用得多人都蠢啲，咁戴住副納米眼鏡咪可以點煲電話粥都得？中文大學生物化學系教授曹宏威表示：「副眼鏡嘅意念唔錯，不過到呢一刻為止，科學都未能證實電磁波對人體有乜壞影響，所以無準則釐訂副眼鏡對人好定唔好。而我用任何物件包括手機，一貫準則係應用則用，唔好濫用，即使電磁波有壞影響都唔怕。」
功能鏡框 愈來愈體貼
香港人總係不甘平凡，買甚麼產品也講求「分唇」，眼鏡框當然亦不例外。「零重量」、無螺絲口，甚至迎合亞洲人的扁鼻樑，已成為本地鏡框的主流。最近市面推出了納米鏡框，可削減手機發放出來的電磁波，減低對人體的影響，夠晒體貼。
超薄膠框零重量
瑞典Infinity鏡框，選用超輕Polycarbonate製成，配合高科技切割技術，加上鋼絲金屬眼鏡臂，戴上後有「零重量」的感覺。膠鼻托採用高且窄的設計，適合亞洲人的扁鼻樑。
售價：$2,800（b）
全球最輕金屬架
堪稱全球最輕的Lindberg金屬鏡架，鈦金屬物料和零螺絲設計，拎上手感覺超輕，又唔怕螺絲鬆脫而出現甩鏡片的尷尬情況。備16種不同顏色的架身選擇，顏色夠晒多。
售價：$3,080（c）
高窄鼻托扁鼻最啱
亞洲人的五官輸蝕在於扁平的鼻樑，戴眼鏡時因不貼鼻而出現下滑情況。呢副日本柳川一郎鏡框，其高且窄的鼻托專為亞洲人而設，能貼合鼻形，再配合彈弓臂，Fit晒不同面形。
售價：$1,280（c）
超硬自作業膠鏡框
來自日本的小竹長兵衞鏡框，全部鏡框均由小竹一家三口親自製造，並採用極硬的Celluloid乒乓球料。鏡框每月只產200副，每副都係獨一無二，夠晒矜貴。
售價：$2,300（b）
小於1mm超薄鋼片
這副ic!berlin鏡框是今夏最新款式，以小於1mm的超薄鋼片製成，又薄又輕。配合超薄的鏡片，戴上後有種恍如無物的感覺，夠晒舒服。
售價：$4,000（b）
窄身膠框啱女仔面形
女仔面窄，好多膠框眼鏡都顯得太闊。呢款Lindberg膠框則較「細」，加埋適合扁鼻樑佩戴的鼻托，啱晒亞洲女仔的瘦削面形。鈦金屬鏡臂包了防滑膠，出汗也不會跣。
售價：$3,200（c）
老花鏡貼床頭
專為老花者而設的閱讀鏡，超的骰的長身鏡架，款式好型。鏡架送磁石片，可貼在床頭，臨瞓時睇完書可將鏡框貼在磁石片上，瞓醒一摸就搵到，夠晒方便。
售價：$250（c）
運動款 彈性行先
每次做運動都唔會戴住副有框眼鏡，一來出汗時副眼鏡會跣得更厲害，二來怕食波餅時會整傷塊面。不過今時唔同往日，市面上不少專為運動而設的鏡框，除了彈性夠高外，部份臂位更有自斷、任校等功能，迎合至激運動的需要。
活動臂激玩都唔甩
這副日本Airlist鏡架用上特製的膠料，即使出汗都唔會引起皮膚敏感及生銹問題。除鼻托及臂位末端迎合運動時的需要外，更有3個長度的臂身選擇，貼合不同的面形。此架需配合Hoya鏡片，全副眼鏡的配鏡及裝嵌需於日本當地進行，百分百東瀛製造。
售價：$1,980（c）
遭撞擊即鬆脫
呢副專為壁球而設的adidas運動鏡框，鏡架在遭撞擊時，受力的臂位會自行鬆脫，避免面部受傷。臂位可因應耳朵的高矮自行調校，架頂的海綿具吸汗效果，配合防霞氣鏡片，打到幾激都唔怕視野模糊。
售價：$1,480（c）
包膠彈弓臂緊貼頭部
TAGHeuer鏡框以輕身為賣點，全副用上鈦金屬製成，以輕身為賣點。雙臂套上橡膠，配合彈弓鉸位，做運動時能緊貼頭部，夠晒舒服。
售價：$2,890（a）
一粒螺絲都無
奧地利的Silhouette鏡框以鈦金屬製成，框上的鉸位參考力學而設計，除了一粒螺絲都無之外，即使點郁，鏡框都可固定頭部，唔怕鬆脫。
售價：$2,000（c）
玩款玩色 迎合潮流
除功能外，眼鏡如Fashion一樣，每季都有不同的款式。自問潮人，當然會不甘平凡，好似左右不規則的設計、超搶眼的色調、布滿水晶的鏡臂，能迎合不同人士的需要，要豪要誇，悉隨尊便。
電腦切割無接駁口
這副EyeWitnessbyTheo鏡框，用電腦雷射切割而成，全副鏡框無接駁口。另一搞鬼之處，是其不規則的設計，無論鏡框、鼻托，甚至臂末端也左右各異。
售價：$4,200（b）
牛角架訂足3個月
用牛角製的眼鏡框相信都算矜貴，全副鏡框採用不同的牛角製成，全以不經漂染的原料示人。以人手製成，需3個月訂做時間，都咪話唔矜貴。
售價：$7,800（b）
兩臂鑲滿水晶
對於闊太而言，鑲石鏡框才是身份的象徵。呢副DanielSwarovski鏡框，全副為鈦金屬物料，最矜貴是兩臂鑲滿了Swarovski水晶，極之奢華。
售價：$12,800（c）
得獎之作交叉臂
奪得2004年法國設計大獎的JFRey鏡框，其得獎之處在於臂前端的交叉設計。金屬配膠的質料，加上大膽的色彩，難怪深得法國人歡迎。
售價：$2,000（b）
領呔做鏡盒
論搞鬼，怎可不提DriesVanNoten的鏡架呢？這副膠鏡架用上極鮮豔的橙色，設計師更以領呔作眼鏡盒，顏色同樣搶眼！
售價：$3,500（b）
黑白色夠潮
黑白色成為近年鏡框的主流色，這副意大利Vogue膠眼鏡，以至潮的黑白鴛鴦色為主，配合長方形的鏡框，是潮人的必然選擇。
售價：$590（a）
售賣點：
(a)高登眼鏡 27353311尖沙嘴海洋中心301店
(b)頂好眼鏡 23852777旺角豉油街福泰大廈24號A地下
(c)名瞳感 28695111中環威靈頓街28號1樓