車路士自從喺前年夏天俾「俄國油王」阿巴莫域治入主後買咗咁多職球員，究竟邊個至係BestBuy？計我求大俠話一定係佢哋行政總監簡安。
咪睇簡安頭禿禿，個樣無厘醒目，其實係扮豬食老虎。佢喺曼聯嗰陣時，經已幫球隊同電訊公司Vodafone簽咗份總值三千六百萬鎊嘅四年贊助合約；喺今季過檔車仔後，佢續發揮其搵錢本色，令車仔喺未來五年可從南韓電子巨人Samsung（三星）獲得英超史上最高嘅五千萬鎊（約七億四千萬港元）贊助費兼剃埋曼聯眼眉。
簡安除咗搵錢叻，重識得搞亂友會嘅薪酬架構。先排佢出面做醜人，先後同阿仙奴左閘A高爾同曼聯中堅李奧費迪南密密斟；小道消息話佢唔係想游說A高爾同李奧費迪南過檔，只不過想炒高個價，令阿仙奴同曼聯要用個更高嘅價錢同呢兩位英格蘭國腳續約。
車仔前線有摩連奴呢個有料領隊，後面則有搵錢力強兼多計嘅簡安；唔怪得佢哋敢下巴輕輕，話可以取代曼聯成為英超歷史最成功嘅球會啦！
新特蘭吼菲臘斯回巢
究竟邊隊最想英超球隊修咸頓喺季尾降班？答案係已奪英超席位嘅英冠隊伍新特蘭。聽講如修咸頓降班，佢哋就出二百萬鎊買對方前鋒菲臘斯。菲臘斯七月就滿三十二歲，二百萬粒似乎有啲貴，但佢未轉會前一直係新特蘭象徵，又慣喺東北比賽，所以對新特蘭嚟講仍物有所值。
摩連奴高價投番心頭愛
車路士領隊摩連奴早排捐佢件招牌茄士咩大褸做慈善拍賣，但因為太過唔捨得，故出比底價一萬鎊高五千鎊嘅一萬五千鎊買返件心頭好。或者有人認為摩連奴佢咁做好無聊，但我求大俠就唔係咁諗，事關一方面可以做慈事，另一方面又唔會冇咗心頭愛。希望佢可如願以償啦！
歐洲足協睇死利記？
歐洲足協日前拒絕英足總要多個來屆歐冠席位嘅要求，發言人話條例（英超四隊參加）定咗就唔改得，至於由利物浦（若贏到今屆歐冠盃）抑或第四名嘅愛華頓參賽，就由得英足總自己諗掂佢。我求大俠覺得歐洲足協一來係卸膊，二來唔知係咪睇死「利記」捧唔到盃呢？
「禪師」獅子開大口
湖人班主畢斯想拉攏前教練積遜回巢，所以安排佢喺今個禮拜同球隊老大拜恩會面，兩人能否冰釋前嫌言之尚早，不過今次積遜肯定會吊高嚟賣，皆因紐約人同騎士都爭緊搵積遜過檔，而且𠵱家喺湖人有求於己，難怪「禪師」獅子開大口，據聞佢嘅開價係一千萬美金年薪。