周末的深夜，置地廣場附近停滿空的士，覺得非常阻塞交通之餘，也替的士司機大佬們嘆一聲搵食艱難。
「我揸的士係想正正經經打份工，付出勞力希望搵到啖食，但係𠵱家揸的士直情好似賭博咁，有客冇客完全講運仔，咁冇安全感，呢種心情相當難受。」跟司機大佬吹水，司機大佬吹出了一大灘苦水，的而且確，正正當當地付出了勞力，但搵唔搵到食尚要望天打卦，心情確係難受。
唔知係情形已經相當普遍，抑或我好彩成日俾我撞到，近日坐的士遇到幾位司機大佬一邊揸車一邊聽電話接柯打，唔知係咪因為呢件事要秘秘密密，所以唔係用車上嘅對講機進行，而係一律經手提電話，司機大佬一邊揸車，一邊用免提裝置接電話，對方落柯打，司機大佬如果係只係代表自己的話，比較簡單，可以用較短時間決定接定唔接該柯打，時間位置如何；但有啲司機大佬唔單止接柯打，重要分柯打，於是第二個手提電話介入，撥幾個電話睇吓有冇手足啱接柯打，有的話，再回到原本的電話向落柯打的覆柯打，司機大佬用字簡潔清楚有力，時間、地點、大致金額簡而清，就像將軍調兵遣將一樣，但請勿忘記，司機大佬與此同時亦在揸車，我暫時將我的生命安全交咗畀佢。
我明白生活逼人，但請小心！
我支持如果乘客主動講價，乘客都有罪，如何執行那是別話。
司機大佬，開開心心出門，平平安安回家，小心！