上星期班政務主任宴請老董，八方搵極都唔見兩個人，一個係下任政務司司長大熱「肥龍」許仕仁；另一個係舊年由貿發局退下火線嘅施祖祥。
肥龍唔到，可能係怕見記者，至於施兄，就因為要陪住施太，晚上謝絕應酬。
八方都聽過施太身體唔係幾好，舊年底施祖祥獲日本政府頒發勳銜時見過佢，當時施太開始治療，人瘦啲，但係好精神，施兄話個療程為期一年，為咗陪太太，佢已經謝絕晚上活動，實行晚晚喺屋企睇《大長今》。
施兄施太兩夫婦之情深，盡見於此。八方記得幾年前施兄有病，施太亦照顧左右。
講開《大長今》，施祖祥話都為之汗顏，因為以前韓國人要嚟香港取經學習拍電影，𠵱家人哋一套劇集打低晒其他節目，可見韓人一日千里，港人要急起直追先得喇。
傳真︰2623-9278
電郵︰[email protected]