「釋法」風波，大石壓死蟹，煲呔兩年考核試用，已成定局！
官場人士語告八方：睇曾爵士有時出席立法會辯論，咳得好犀利，有幾次重係患咗大感冒，鞠躬盡瘁咁死頂上場，睇嚟爵士嘅身子，唔好得過企得耐頂唔順故此要辭職嘅董伯好多！冇錯，「選舉」之後佢「依法」做埋「餘下任期」嘅兩年，不過千祈保佢大，唔好做到二○○七年一月就抱病「慣」低，若果唔係，到時又再「選」過，重有邊個阿福肯出來「競選」？
剩番唔夠半年，就算到時由政務司司長肥龍許仕仁頂包，肥龍可以大掃場，因為按照《基本法》，行政會議全體任期，不得超過特首撈咁耐，肥龍到時解散行政會議，又可以委任到邊啲「精英」，同佢「看守」一百五十日左右，冒住冇得撈嘅大風險「入閣」？
老董「連任」時，帳面有五年任期，想到處招聘「精英」做「問責部長」，年薪三四百萬都尚且獵頭困難，放棄原本高薪，跟佢上錯咗船嘅，例如冬冬、肥平、馬仔亨，一係喊得一句句，一係就暗揼到出唔到聲，咁若然爵士○七年一月健康真係頂唔順咯，剩餘嗰五個月，咪只有申領緊綜援嘅人士，先至會打崩頭攞表格申請做「部長」？
定係到時又再「釋法」，剩餘嗰半年，「骨」一聲又可以伸長加大為五年？定係到時王振民、邵天任、賭王何，又試一人一把聲咁，一個話新特首只准做五個月，一個話其實係五年零五個月，一個話唔係，係十年零一百五十天？
一截蘿蔔，可以愈截愈短，截吓截吓，就變咗冇！天有不測之風雲，想避免司法界整多鑊黑衣大遊行，壽爺當務之急，就係委派氣功師、特異功能神醫等等，日夜幫當奴把脈針灸、開補藥，力保未來兩年，當奴力健如牛，老虎都可以監生打死三兩隻，而唔係企企吓腳軟，或者頻頻攞條手巾仔出來擤鼻涕打乞嗤！當奴假假哋都已屆花甲之年，為避免又一次憲政危機，好親身過吓馬路，行多啲街道，或者打多幾圈麻雀，避免老人癡呆，一嘢隊到底，捱到二○一二年。
傳真︰2623-9278
電郵︰[email protected]