韓國肌肉型男權相佑憑慘情劇《天國的階梯》入面嘅誠俊哥角色，喺日本人氣急升，佢上個月秘密咁去咗東京，成為日本狗仔隊目標，而今期日本女性雜誌《女性自身》亦發掘咗誠俊哥細個嗰陣嘅珍貴相片同埋少年時代鮮為人知嘅經歷。
權相佑童年時嘅生活非常困苦，有一位大佢五歲嘅哥哥，而權相佑喺出世六個月後，佢位教師父親就因為肝癌離世，令權媽媽大受打擊。權媽媽帶住兩個仔喺十年內搬咗十次屋，以喺食堂工作維生，所以權相佑小時候窮到冇玩具玩。佢曾經喺自傳提過有朋友問佢點解冇玩具，當時佢重自欺欺人話：「身處喺美國嘅爸爸會買好多玩具返嚟。」真係聽到都心酸。
權相佑喺fans心目中有型又靚仔，原來佢小學嘅時候已經生得非常俊朗，重有對深啡色嘅眼睛。權相佑雖然家境清貧，但權媽媽無論工作幾辛苦，都堅持洗乾淨啲衫先畀佢兩兄弟着，等佢哋打扮得整整齊齊。
權媽媽都有教權相佑做人要堅強，所以佢喺小學同中學嘅成績都好好，尤其係英文同體育科特別醒。不過，佢都記得自己曾經有一次唔記得交功課，俾老師鬧到狗血淋頭。權相佑高中開始長得高大英俊，一返學就吸引唔少女同學包圍，搞到佢面都紅晒㖭。