特區政府自從換咗個新頭頭之後，好多嘢都反應快咗同埋正路咗。好似噚日國民黨主席連戰喺赤鱲角機場過境，署理特首煲呔就好識得擦鞋，嗱嗱臨派林D9去機場恭候。聽講煲呔覺得呢件係國家大事，所以要隆而重之。嗱，呢啲就叫做高政治智慧喇，點會好似老董懵盛盛唔畀馬英九嚟香港咁吖。
至於中華旅行社總經理鮑正鋼點解冇得去貴賓室，煲呔哋梗係話唔知情啦，你交畀林公公做，係咁上下㗎喇。
卿姐成日話要摺埋政制事務局，都唔好話冇原因，又睇吓唐唐今日喺立會點答辯啦。立法會今日下晝會恢復辯論《2005年撥款條例草案》，平時係咁意只有幾位官員作答，不過，由於班新議員瓣瓣都燒到，所以罕有地三司十一局都會到齊，個個都話會企起身逐一回應，煲呔打頭陣，唐唐押尾。
傳真︰2623-9278
電郵︰[email protected]