外圍股市受到美股影響，軟弱乏力。南韓經濟本來表現唔錯，但股市跌吓跌吓，整體P/E（市盈率）竟然跌到七倍半，近歷史低位，大行嘅策略師建議趁低吸納南韓股票，不過如果有人聽佢支笛嘅話，南韓股市P/E就唔會咁低啦。
香港就唔同，股市跌得唔多，似乎不受杜瓊斯指數所影響，究其原因，好簡單，就係外資流入，戀棧不走，一味好耐性等人民幣升值。既然大量資金流入炒人民幣升值，當然有唔少流入股市，支撐住恒生指數。故此艾爾敦大班指出，香港有咁多游資，隨時逆潮流，人哋加息，香港減息㗎。
財務伍就因此而覺得頭痛，佢嘅客戶到大陸買資產，入股內地企業，其中一宗涉及幾億元人民幣，簽妥意向書，預期年尾完成盡職審查，今年年尾付款。客戶恐怕人民幣升值，價錢（以港幣計）就會貴咗，於是問內地企業：「好唔好以今日滙率定好價錢？」內地企業當然唔肯，回答話：「到付款日先至定滙率啦！」客戶惟有問計於財務伍：「如何對沖人民幣？」對沖方法通常係買遠期外滙合約，買貴咗當係買保險，但係遠期不交收人民幣合約有折讓四千五百點，換算起嚟，等於年利率四點幾巴仙，保險費等於千幾二千萬港幣，客戶大嗌一聲：「有冇搞錯呀？」
財務伍問我哋有乜意見，左丁山膽粗粗話：「我話人民幣今年唔會升值，要對溫總理有信心，美國佬愈加壓力，市場愈多預期，中國就偏偏要對着幹，中國人民是有志氣的，升值時間唔會俾人估得到，所以唔使買遠期合約！」
此語一出，即刻俾成班老友鬧，佢哋個個都係高級打工仔，如果咁樣做嘢法，明知有升值風險而唔做事，人民幣真係升值嘅話，點算？邊個可以負責？左丁山係自由身，講風涼話無妨，於是大家一路食晚飯，一路拗，始終冇結論。