鄭伊健同林保怡噚日喺西九龍溜冰場拍無綫劇《隨時候命》，伊健喺劇中扮演一個八卦公，乜嘢都關佢事。噚日拍攝嘅劇情係講保怡個仔有心理障礙，伊健去教保怡個仔溜冰，伊健同保怡換完溜冰鞋入場之後，伊健都玩到幾吓，保怡就全程𢱑實牆邊唔敢郁，伊健試過拖實保怡出去玩，但保怡就好鬼驚。而做保怡個仔嘅童星又係唔識玩，全程捉實伊健，伊健都好有耐性教個小朋友玩。
伊健溜冰唔算好叻，試過幾次差啲跌低，佢都拍住心口話好驚，伊健話：「好耐冇玩過，幾年前買過對roller，點知買完之後冇朋友肯陪我玩，所以到𠵱家都未用過。個場咁多人，如果跌低都幾瘀，聽講張栢芝幾勁，不如叫佢嚟玩啦！」保怡就話新年去過北京溜冰，嗰次佢樂極忘形到唔記得自己係唔識玩，結果成個人拋起再撻落地，搞到隻腳瘀晒。
張震噚日去太古城宣傳電影《愛神》，戲入面有幕係講鞏俐幫佢手淫，意識非常大膽，而拍嗰時正值沙士，所以張震笑話個人衞生好緊要，重叫對方洗手。張震重話呢場戲拍咗八個鐘，都幾辛苦，一啲都唔係享受，導演王家衞都有用手同佢試戲，令佢好尷尬。另外，佢主演嘅電影《最好的時光》有份參賽今屆康城影展。
葉德嫻噚日喺商台接受訪問，佢最近為演唱會努力排舞，重話個舞台諗住做到好似一個土星咁，佢話：「因為有啲人覺得我嘅性格好似外星人喎。」佢重話本來想好似張學友之前嘅演唱會咁唱晒人哋啲歌，不過監製反對，佢話：「監製話學友開過咁多次演唱會，我點可以同人比，所以最後只准我唱一首楊千嬅嘅《大城小事》。」
林志玲因為工作多同壓力大而暴食，但仍然好瘦，佢噚日喺台灣出席浪琴表活動時對此話：「我一餐可以吃兩個便當，有時候會先吃一個，過兩個小時再吃一個。」林志玲嘅媽媽吳慈美日前着和服行騷，問林志玲佢媽媽唔擔心反日嗎？林志玲話：「我媽媽超熱心，朋友的邀約總是義不容辭也不好意思拒絕。」
英國老牌組合BeeGees成員RobinGibb六月十同十一號喺香港開演唱會，反應熱烈，重有消息指董建華同曾蔭權都預定咗門票，所以主辦單位決定喺六月九號加多一場。而今次RobinGibb再度加場，以外國歌手嚟講原來好罕見，預計會有超過二萬三千fans欣賞到佢嘅精采表演。
元華同關心妍等前晚喺將軍澳電視廣播城，任鄭裕玲主持嘅《百法百眾》嘉賓。元華同黃秋生一齊演出電影《阿嫂》，問元華同秋生有冇碰頭？佢話：「未碰頭呀，劇本都未出。」不過元華話會同秋生打招呼，再問元華會唔會因為秋生批評過佢嘅演技，演出時更落力？元華就話：「唔係單為呢件事先落力，我向來都做到最好。」
陳淑蘭噚日以嘉賓身份到金鐘出席一個關於排毒淨腸產品嘅活動，佢話自小已受便秘困擾，成日要食瀉藥，因而鬧出唔少笑話。陳淑蘭話佢曾試過將甘油條塞錯部位，遭鄭裕玲取笑，佢重自爆同前度男友祈文傑歐遊時，並唔係遊名勝，而係遊當地嘅洗手間而俾對方鬧。
