港股噚日成交明顯增加，高達201.44億元。在成交配合升勢下，恒指一度升破13900，最高見過13919，收報13859，升109點。期指周四結算，好友今日可能會繼續挾高，後市有機會上試萬四關。
3月新批樓按大升44.8%，反映市場對樓按需求增加，亦解釋銀行為何在激烈的競爭中，可以調高按揭利率及減少回贈，反映樓市炒風強勁，炒家無懼加息。地產股明顯受到追捧，新地（016）、恒地（012）及信置（083）均升逾2%。
噚日港股大升，不過嘉華建材（027）股價就好似玩過山車，早市跌11.64%至6.45元，午後才逐步收復失地，以7.10元收市，跌幅收窄至2.74%，成交高達4.41億元。市傳先前有份幫手的炒家開始撤退，據講主因是早前配股反應欠佳，加上公司集資壓力龐大，以及好消息已盡出。
華晨（1114）前日公布的業績令分析員大跌眼鏡，噚日股價表現亦打破唔少市場人士的眼鏡。華晨盈利大倒退95%，遠遜於市場預期，股價跌10-20%，甚至更大幅度都唔算誇張，但華晨噚日最多只跌4.5%，低見1.26元，亦唔見高盛好落力接貨，全日收報1.29元，只較周一收市價及高盛目標價1.32元跌2.27%，成交金額5717萬元。i師傅話，反映大戶手上冇乜貨，早已沽得七七八八。德銀叫客減持，目標價大降至0.80元，但花旗繼續睇2元。
冠中地產（193）最近由1.8仙起步炒上，噚日再升7%至3仙，累計升幅達67%。此股發債集資，準備進軍濠江，此外又傳有人斟買殼。旗下地產代理世紀21計業績唔差，可望分拆上市。
阿虎