雖然大市噚日升番過百點，百花齊放，但嘉華國際（173）同埋嘉華建材（027）仍然繼續係市場焦點，尤其係嘉建早市勁挫最令投資者心傷，好彩臨收市前突然有大盤出現，將隻股掃高，令跌幅大為收窄，否則小股東喊得重淒涼。
嘉建昨日最低見過6.45元，收7.10元，跌2.74％，成交股數6070萬股，金額4.15億元。據講參與注入賭牌交易的所有關連人士，對嘉建復牌後的表現相當關注，並想意圖補鑊，改善與投資者關係。但經紀黃就維持悲觀態度，皆因隻股已跌破批股價8元，要炒番上去阻力重重。
另外，經紀黃向小初推介ASM太平洋（522），佢話隻股早排受大市氣氛影響，股價回落唔少，但有分析員見過公司管理層後，話半導體行業已經由谷底反彈。雖然ASM首季接單情況比去年同期為低，但第2季已經回升，不妨趁低吸納。ASM昨日升3.83％，收32.50元，成交金額3673萬元。
慕容小初