十年前落吧，女仔總愛叫各式甜甜哋的支裝酒精飲品；十年後，支裝甜酒跌出最受歡迎榜，取而代之的是MixDrinks！當今全港至潮的Mix不止一款，原來由五大元素溝成：益力多、利賓納、綠茶、荔枝酒和紅莓汁，跟酒精或其他飲品Mix出至潮Local溝。
記者：楊一凡
攝影：陳智良、楊錦文
利賓納裝假狗
Kelly＆friends：「以前我次次都飲DiamondBlack，但𠵱家人人話我Out，所以落酒吧唔好意思再叫，但自己又鍾意個酒味，於是搵酒保幫我溝個類似嘅味。結果佢用利賓納溝酒，𠵱家我去邊間吧都飲利賓納Drinks。」
夠新鮮易入口
Warren&friends：「蒲吧通常會試新飲品，紅莓溝伏特加個味唔錯。飲MixDrink最緊要易入口，同埋個組合有新鮮感。雖然芝華士溝綠茶係好Hit，但味道一般，唔易入口。」
王菲飲我又飲
Nelson：「早輪傳得好勁，話王菲去Clubbing都係飲芝華士綠茶，講到唔飲好似好Out咁，所以落親酒吧我都會柯打，攞上手都型啲。」
媾女必叫荔枝酒
Louis：「有次貪得意叫BarTender溝個新飲品畀我，就係荔枝酒加白酒。坐隔籬幾個女仔見杯嘢咁靚，即刻問我係乜嚟㗎，無意中就打開話題。之後每次單拖落吧，十次總有五次識到女仔。」
係女都愛益力多
Kade：「有次見益力多溝嘅Shooter特價就柯打，好多女仔都會好奇問，我就順勢叫埋佢哋一齊玩。益力多溝酒俾人感覺無咁『啃』，換轉係平時的Shooter，人哋一睇就怕怕。」
溝酒原來有預謀
芝華士綠茶的興起，是鋪排並非偶然。修士吧的老闆話：「以前肯花錢開酒，飲『硬嘢』（威士忌）的客人只限夜總會或傾生意。加上十年前支裝甜酒又興起，令『硬嘢』巿場愈來愈窄，於是酒商就自己諗溝酒，令飲品更易入口。結果係撞綠茶，芝華士就先來明星效應，再畀優惠酒吧做推廣，短時間內『芝華士溝綠茶』開始普及，呢個組合入晒腦。」
飲得多好易屙
至於荔枝酒同樣係酒商有心谷出來的，因為當年酒商曾經搞過一個Cocktail的比賽，賽後好多由專業酒保試練過的配方在坊間流傳，選擇多自然受女仔歡迎。但係益力多溝酒呢啲咁搞嘢的創作就真係胡亂試出來的，而且因為益力多跟住啲酒力逼入腸，飲得多真係好易屙！但係益力多逐支落成本高，唔似大Lot酒咁低成本，所以始終Hit極點都有個譜。
玩轉懷舊遊戲
No.1：十五二十全枱玩
興咗好耐的十五二十，新玩法係成班人輪流嗌，贏咗行開，玩到最後輸剩兩個，最後輸家就要攞$20出來畀酒錢。如是者一圈又一圈咁玩，好刺激。
No.2：喜力波子棋
推出約一個月的喜力波子棋，屬非賣品，暫時只供酒吧作推廣用。不過由於棋面和波子均與以往不同，故特別受歡迎。
No.3：廿一點落酒注
近排多客人玩廿一點和十三張，輸咗罰飲啤酒和Shooter，落一注隊一杯，唔玩錢好衞生。
酒保推介：女仔至愛
西瓜甜酒×七喜$48(a)
10個有8個女仔鍾意飲，因為西瓜味好熟悉，加上帶少少甜的果味酒，入口充滿夏日感覺。
Baileys×Drambuie$52(d)
口感Creamy，甜得來濃味能遮蓋酒味，年輕女仔同學生妹最鍾意。不過唔講唔覺，其實酒精成份幾重。
Tequila×Gin,Whisky$48(a)
TequilaPop的年代過後，家陣興用Gin和Whisky中和Tequila的酒味，味道甜甜哋很似利賓納，OL落到嚟最鍾意飲。
辣椒至激
修士吧的老闆阿Ken首創「三國演義」，以花雕、日本清酒及美國威士忌比喻三國，再滴些少Tabasco暗示國與國的爭吵，反應不錯，每次都溝成十杯八杯。
（a）ITMondena（23830088）
地址：旺角太平道3號地下
（b）Zip（31883818）
地址：灣仔謝斐道303號王子酒店四樓
（c）修士吧（23177308）
地址：尖沙嘴海港城地下G121舖
（d）鸚鵡吧（27353033）
地址：尖沙嘴海港城地下G120舖