容祖兒（Joey）日前在廣州舉行演唱會時，有千多名觀眾疑持有無效門票不能入場，內地警方指當中涉嫌詐騙，正向主辦單位展開調查，Joey怕觀眾以後不買飛，會想方法補償歌迷損失。
古巨基、莫文蔚（Karen）、范曉萱、林峯和容祖兒等，前晚在無綫將軍澳電視廣播城演出《勁歌金曲》。
Joey日前在廣州舉行她的首個內地演唱會，有千多觀眾因持無效的演唱會門票而被拒絕入場，內地警方指大量門票無效構成詐騙，正着手調查主辦機構。Joey說：「件事交咗畀公司處理，𠵱家睇吓有乜嘢補償方法，我都希望下一次會做多幾重保安，杜絕呢啲情況發生，我怕以後冇人買飛嚟捧我場。」
而前晚Joey與范曉萱在節目中碰頭，即拉着小萱說：「我好欣賞小萱，視佢為偶像，佢除咗靚女，又多才多藝，我都好希望將來有機會合作。」
至於林峯在節目中演唱新歌《領會》時，竟在中段忘記歌詞，幸好歌迷大聲和唱，才沒有被發現，他事後說：「好彩我嘅眼神夠堅定，不過我記歌詞真係比記劇本渣，要搵方法記一吓先得。」
此外，Karen稍後會在紅館開演唱會，她表示日前往試衫，還嫌服裝的質料不夠透視，她又強調不會邀請男友馮德倫看騷，Karen說：「唔好啦，我唔想俾人搶鏡。」Karen透露會邀請好友古巨基和陳奕迅做嘉賓，古巨基說：「我想睇Karen個靚背脊，但又怕佢會『攝』親，佢對腳同我一樣長，分別之處佢冇腳毛，我就有。」
採訪：李珮洳 攝影：仇志德
