AV陳列室：<br> 國產機首度加入HDMI播DVD高清冇鋸齒

AV陳列室：
國產機首度加入HDMI播DVD高清冇鋸齒

論硬件，香港唔少人已擁有LCDTV及Plasma，即係HDReady。不過軟件上，仍停留喺電視《大長今》或DVD，奈何一句「高清無緣」！GIEC最新落場一部GK-3288，強絕國產DVD機界！可以將普通一隻DVD以高清的1080i輸出，再加上行全數碼高清的HDMI插口，就算播普通DVD都可直上1080i，畫面細緻得嚟冇鋸齒，算係國產DVD機中最強！

記者：朱崇德
攝影：陳陶鈞
ImageGirl：Yuki

將普通DVD最高的480p（480線逐行掃描），增強至1080i（1,080線隔行掃描）高清畫面輸出，其實早有前科！以往發燒級玩家通常會使用外置式「倍線器」，不過閒閒哋盛惠3萬大元，真係玩得幾富貴！至於日本方面近年亦有推出一些內置「倍線」功能的DVD機，但入場費用都在$8,000或以上，亦有點叫人吃不消！今次偉大祖國出品嘅GIECGK-3288，繼承過往抵用傳統，$1,698開賣價，可以話首度將1080i/HDMI變得平民化！

■$1,698

擺脫國產機娘味

一機在手，第一個觀感係外形幾討好，Slim設計鋼琴黑面機身，創新磨砂透明光碟盤，透射「型藍」亮光，再加一個藍色Display陪襯，都幾有日本仔大機格局；不過最強當然係播放功能，基本對應一般DVD碟?電視機480p或480i輸出功能，但如果家有HDReady的顯示器材，重可以輕易倍線上720p（1,280×720）或1080i（1,920×1,080）。論畫質，在愈大吋數的LCDTV及Plasma之上，畫質改善愈明顯，DVD影像變得實淨、銳利，以往DVD碟因解像度唔夠而出現「鋸齒邊」的情況，亦得到明顯改善。

■全透明碟盤，型到震！

■關上碟盤時，透射陣陣藍光，幾有氣勢。

■國產機真係永遠不忘卡拉OK功能。

HDMI玩齊聲畫

講到提升畫質的功能，更不能不提機背絕強的HDMI，須知這可是國產機首次加入呢！HDMI插口基本屬HDTV的通用影像傳輸連接埠之一，GK-3288的最高傳輸速度為3.95GBPS（全速為5GBPS）、行全數碼，而且一個插頭重兼具有左、右聲道功能！所以一條線駁電視有聲、有畫，乾手淨腳！不過追求靚聲效者，機身一樣配備光纖、同軸等數碼音效輸出，駁AMP出聲效表現令人相當滿意，如果想玩得簡單啲，佢亦有直出5.1聲效功能，可算係新手、專業玩家都照顧周到！

■最左邊扁扁平平的，就係HDMI插頭。

■講線價，色差同DVI都好接近，三百零蚊就買到條唔錯嘅1.5M線。

色差輸出谷上1080i

玩高清1080i除HDMI外，機身的色差輸出一樣可對應720p或1080i！論畫質，色差雖然是行Analog訊號制式，但影像表現都非常強（當然睇你係咪行貴線啦！），都可算係照顧埋一班LCDTV及Plasma用家！另外一提大家，其實HDMI及DVI是使用相同的影像傳輸訊號制式（但DVI沒有音效傳輸），如果大家行吓「鴨仔街」，二百零蚊大概可以買到一條質素唔錯嘅HDMI→DVI的轉線，呢種玩法，當然係啱晒一班投影機用家啦！

GoldbestLimited
查詢電話：23071505

色差VSHDMI　1080i比拼

老實講，HDMI/色差表現都已經係一般DVD機之上，硬分比較，HDMI色彩較鮮啲、鋸齒亦見少啲。