中國國民黨主席連戰，在民進黨一片猛烈抨擊之下，今日終於會以「個人」身份，經特區北上，訪問北京！
連某在北京，將會會見中共總書記胡錦濤！自從蔣公退守台灣，大陸失陷，台灣就形容老毛係毛匪，大陸又話老蔣係「蔣幫」，就咁鬧吓鬧吓，中國人咁就冇咗六十年光陰！
六十年來，出面個世界就唔會等你！不但尼克遜會見過赫魯曉夫，以巴兩國領袖亦喺大衞營握手，就連「中華民國」副招牌，俾李登輝陳水扁拆落來當柴燒，反為大陸佬現時當呢四隻字係寶！
老董政權對國際大勢及國共關係，幼稚夾無知，因此當台北市長馬英九想來特區，出席港大論壇，都遭到老董阻撓！當正馬英九有輻射！結果馬九哥義憤填膺，更加認清所謂「統」嘅真面目，反對所謂反分裂法。
馬九哥嗌得把聲音都幾大，老董佢揣摸主子面色，自把自為，咁樣「垂範台灣」，你話壽爺係唔係多得佢唔少呢？
呢勻連戰北上，嘿，又唔見曾爵士「堅持一個中國」，拒絕畀連戰喺香港過境？人哋冇「呆胞證」，重係揸正中華民國護照入境㖭！重要走去西安拜訪佢以前讀過書嘅嗰間小學，十足卸任總統君臨故國國土咁嘅款，而壽爺亦當做佢嚟「歸降」，各有各阿Q，各取所需！
所謂「國共合作」，經已係歷史名詞！若然咁就變咗「國共第三次合作」，咁香港咪英女皇復辟回朝？連戰一冇政權，二無選民認可，淨係個腰插住一把玩具槍，點樣「國共合作」呀？所以都係合作作一場秀。
傳真︰2623-9278
電郵︰[email protected]