嶺大噚晚宴請傳媒主管，校董會主席梁振英去到講兩句就走人，皆因佢趕住去會展出席各界恭賀老董榮升政協副主席嘅重大宴會。振英哥走咗，改由校長陳坤耀同班高層撐場。
陳坤耀做咗十年嶺大校長，佢認為嶺大有三個關要打通，包括UGC（即大學教育資助委員會）、僱主以及老師，結果你估邊關唔掂呢？唔係UGC，因為今年嶺大攞到百分之五嘅撥款增長；又唔係僱主，數字顯示嶺大九成九畢業生搵到工做；原來係陳校長口中形容「最頑固嘅中學老師」。
佢話，啲中學老師唔理咁多，總之叫啲學生唔好去嶺大，話畢咗業都冇工做，激到佢生蝦咁跳，因為事實唔係咁。八方都去過嶺大，講校園同師資都唔錯，啲老師又的確唔使太計較，乜都同港大中大比，實比死人。又嶺大大公關趙少梅好事近，佢下個月會移民，陳校長又要搵人啦。
傳真︰2623-9278
電郵︰[email protected]