現代社會資訊發達，近排樓市又咁興旺，中記於是搞個網上電視台，將第一手資訊發放畀公眾。暫時只限中記內聯網睇到，等流程暢順後，下個月正式面世。
呢個網上電視台名為CPN，錄影室就喺中環新世界大廈十九樓，聽講，有齊各式各樣影音器材，投資額成百萬。聽聞，錄影室有齊背景、燈光等裝置，有日景同夜景之分。中原集團主席施永青、各區董事同埋財經名嘴陸叔陳永陸，都先後上過去做訪問。
雖未出街，製作部員工急不及待搵嚟長實郭子威，作為首位嘉賓，介紹長實就快開賣嘅長沙灣宇晴軒第六座，段片今個禮拜喺中原網頁有得睇。
蘭西有啲疑惑，中記訪問地產界人士，係咪會畀人感覺唔夠客觀呢？
啲人有時三唔識七都可以傾一餐，利記區國健話，佢有次喺荃灣茶餐廳等客，點知女侍應見佢拎住本樂悠居樓書，主動問佢個盤資料，結果，幾日後同男朋友買咗個單位，𠵱家已經升值二十幾萬。
最近，區國健轉咗去東涌做，呢對情侶有日入去探佢，順道睇樓，即日又以二百一十萬，買入映灣園三座高層C，噚日再以二百四十萬，增持多個八座F，兩單位半年後入伙。據聞，呢三個單位，都係用五巴仙首期買，樂悠居已經決定放售，映灣園就可能會賣咁一個。
荃灣中心二百八十七呎「蚊型」單位，一向甚少成交，最近竟然連錄得兩宗。
美記梁仲維話，呢類單位都係屬於開放式設計，只係屋苑第一期至有。
佢話，四座E以六十八萬成交，每呎二千三百六十九，而六座E，就以七十八萬易手，呎價高見二千七百一十八。𠵱家荃灣中心平均呎價約二千一。梁仲維話，兩個單位都係頂層連天台。其中一個買家，據聞已將單位再度放售。
荃灣中心𠵱家得番兩個同類放盤，叫八九十萬，拍得住屋苑四百零四呎單位嘅九十萬成交價。
梁仲維話，呢類單位月租三千零，適合單身人士或兩夫婦。
荃灣中心現有一百八十個放盤，叫價每呎二千四。
觀塘新潮流商場apm試業，每日人流直迫二十萬，帶挈同區舖市，商場拆售潮，亦瞬即由一線嘅旺角、銅鑼灣，蔓延至二線觀塘區，由楊姓投資者揸咗好多年嘅牛頭角裕民中心一樓半層，現由惠康每月六十萬租緊，都攞埋出嚟拆，平均呎價萬五，直迫一線旺舖。
代理美記話，個場新名裕民薈，會間一百八十間細舖，四十至三百呎，最低呎價要萬二，由於銀碼細，最平個舖七十幾萬，兼有銀行估到價，有唔少買開住宅嘅客都嚟買，噚日賣出近一百間，如果賣晒，估計收兩億七。
電郵地址：[email protected]
