選管會噚日搞諮詢會，聽吓市民對特首選舉指引有乜意見，點知出席嘅記者重多過市民，成朝得四個市民參加。胡官就話，市民反應冷淡，係因為啲人冇意見啫，唔代表係反小圈子選舉喎！
有個曾姓市民，唔知係咪煲呔親戚，喺會上問埋啲好無厘頭問題，差啲考起胡官。曾先生問，如果特首候選人煮飯畀佢老婆食，咁啱佢老婆又係選民，咁又算唔算係提供食物誘使人投佢一票？如果成家人去酒樓食飯，啲家人個個都係選民，咁啱間酒樓貼咗個候選人嘅海報，咁係咪食飯嘅時候就唔可以望啲海報？胡官就話，一家人不嬲都一齊食飯，梗係唔會話煮飯去誘使個仔投票畀阿媽啦，就算阿媽唔選，佢都會養個仔啦！如果一家人一直都一齊去酒樓食飯，呢啲當然都唔算賄選啦。唔知阿曾生滿唔滿意呢？
傳真︰2623-9278
電郵︰[email protected]