修咸頓日前喺南部打吡戰輸畀樸茨茅夫，面臨一九七八以來首次降班的機會愈來愈大，留唔留到級，跟住對諾域治、水晶宮同主場對曼聯真係要全贏先至得。
我求大俠覺得修咸頓搞到今日地步，領隊哈利列納都只係受害者，班主路維先係罪魁禍首，球隊由上年二月開始史特根離職，先後由史杜洛、域尼執掌，兩人各自掌舵只有四、五個月；到哈利列納突然由南部死敵樸茨茅夫過檔，教咗只不過五個月，領隊走馬燈咁換；可謂球隊大忌。
最慘係部份主力球員，好似日前開賽前熱身拉傷腿肌嘅哥治之後可唔可以復出仍是疑問，原本好穩健嘅門將尼美，對樸茨茅夫踢到騰騰震，前景難樂觀。𠵱家修咸頓重有三場全勝翻身，護級形勢咁緊湊，絕對精采過大局已定嘅爭標形勢。我求大俠就建議電視台季尾多啲揀護級球隊賽事直播，話晒有競爭性，好睇啲！
柏度夫挑釁球迷抵罰
喺日前些路迪擊敗格拉斯哥流浪呢場蘇超榜首大戰中，最出位嘅都可以話係些路迪嘅保加利亞中場柏度夫。因為佢喺同些路迪先開紀錄後，竟然走去流浪球迷面前慶祝，結果俾球迷汽水飛頭；佢重因為慶祝過激而俾球證罰黃牌㖭！雖然有讀者或會覺得柏度夫好慘，不過佢喺場關係咁重大嘅球賽度做出挑釁性行為，我求大俠就認為佢抵罰喇！
古利不敢自比羅馬里奧
古利擒晚梅開二度助巴塞大勝馬拉加四球，繼續領先皇馬六分。過往古利入波多數係中路勁射，但擒晚第一個波居然係用頭飛頂入網，呢位身高得一米六四嘅球員都話估唔到。當地傳媒將佢同前巴塞名將羅馬里奧相比，古利就話：「我點敢同佢比呀！」點解咁謙？我求大俠認為可能同佢剛加盟承諾今季入十球有關，話晒𠵱家入得九球咋？
諾斯安尼早應「蒲頭」
噚日NBA季後賽公牛贏巫師場波，最出風頭肯定喺攞到二十五分同十八個籃板嘅阿根廷外援諾斯安尼，佢嘅籃板數字更創季後賽新人紀錄㖭。其實呢位二十五歲球員上季已經喺西班牙職業聯賽打波，重係舊年雅典奧運阿根廷男籃奪金嘅功臣，唔係全冇大賽經驗㗎；可能公牛今季有哥頓呢位新人鋒芒太勁，先令人忽視咗諾斯安尼嘅本事！