澳門賭業股新聞一浪接一浪，但唔知點解噚日晏晝，幾乎所有濠賭股都回落，惟獨龍頭股新濠國際（200）企硬，守於20元，升1.27％。睇嚟濠賭股暫時都要忍忍手。
經紀陳噚日推介一隻冷門股實達科技（706），一來隻股業績轉虧為盈．二來早前收購的大陸自動櫃員機管理解決方案生意，有人睇得相當好，預期會成為未來公司賣點，公司稍後將向證券界人士推介，所以值得留意。
實達截至去年12月底止的全年業績，盈利有805.4萬元，不過冇息派。早前實達以5000萬元人民幣，買入從事向中國金融機構提供自動櫃員機管理解決方案的龍騰科技權益。
實達早排曾經炒過一轉，最高見過0.475元，據講係因為有炒家收到風公司有搞作，所以偷步炒高。
家陣股價回落頗多，有得諗。噚日跌4.23%，收0.34元，成交股數54萬股，金額19.4萬元。
慕容小初