早前來港開騷嘅加拿大搖滾小天后AvrilLavigne，雖然係冧盡全球少男少女嘅甜姐兒，但佢火爆起嚟都非常臭寸，日前佢喺荷李活一間夜店門前被偷拍到飲到爛醉如泥，其間唔止大鬧ParisHilton係蕩婦，重向狗仔隊豎起中指同爆粗㖭。
現年二十一歲嘅AvrilLavigne，日前喺荷李活夜店SpiderClub飲到醉醺醺，行路時都企唔穩，要拉住同行女性朋友嘅衫尾嚟行。好多人都知Avril好易發老脾，當晚佢發現有狗仔隊偷拍佢，即刻喺車窗捐咗半個身出嚟，重用車內嘅揚聲器鬧人，一邊舉起中指，一邊爆粗大叫「去你的狗仔隊」，非常勞嘈。據在場記者所講，Avril連ParisHilton都鬧埋，喪鬧佢係蕩婦。雖然呢樣嘢係全球公認，但Avril都唔使講到咁揚㗎嘛。
此外，前晚ParisHilton就同剛獲名人之星嘅靚仔司儀RyanSeacrest喺洛杉磯一齊主持AmericanTop40Live音樂會，呢個節目主要表揚一啲今年喺電台節目AmericanTop40上非常受歡迎嘅歌手同組合，被指形象學AvrilLavigne、而Avril又好唔妥佢嘅希拉莉杜芙（HilaryDuff）亦係表演嘉賓之一。