馮仁昭四圍超：
章小蕙翻啅法籍舊愛香閨度春宵

章小蕙去年自爆同法籍男友MarcSt.Honore分手，今年初二人被雜誌拍下當街親熱照，章小蕙就死撐係角度問題，強調大家只係朋友關係。不過前日凌晨章小蕙就同Marc去咗蘭桂坊蒲吧，之後重帶男友返香閨過夜，成功翻啅舊愛。
前日凌晨兩點，着住大露背緊身裙嘅章小蕙肉光四射，佢同Marc結伴離開蘭桂坊KeeClub，Marc重邊行邊摸女友背脊。後來佢哋一齊搭的士返女方喺山頂道嘅香閨，Marc重成個男主人咁款，大搖大擺登堂入室。

韓君婷同場
而韓君婷亦喺前日凌晨點幾同大班女友離開KeeClub，雖然早前有報道話佢同陳欣健女兒陳早茵關係密切，但蒲吧友儕中就未見陳早茵出現，韓君婷只係同另一中性打扮嘅女友同搭的士離場。
採訪、攝影：娛樂突發組

徐若瑄心情差搵人陪瞓
徐若瑄早前喺台灣拍咗一個公益宣傳片段，大會重用咗佢首新歌《愛笑的眼睛》做主題曲，徐若瑄話自己心情唔好嗰陣鍾意搵人陪，試過有一次佢心情唔好，家人就足足十日輪流陪住佢瞓覺、食飯、去廁所、睇DVD同傾偈，直到佢開心番為止。徐若瑄又話大家千祈唔好將唔開心嘅嘢收埋，同人傾多啲，就可以減少做儍事嘅機會。

劉德華行宮變旅遊勝地
一直有傳劉德華會迎娶女友朱麗倩，雖然一直未有消息，但係日前就有人爆料，話見到華仔同朱麗倩喺大馬嘅豪宅露台一齊淋花，最有趣嘅係呢間豪宅，𠵱家竟變成當地嘅觀光景點，而住喺附近嘅鄰居，都會以「劉太太」稱呼朱麗倩，喺當地巡邏嘅警員，就形容呢個豪宅係華仔嘅「行宮」。

六魔女鍾秀嫻承認藏毒押後判
曾參演電影《六魔女》嘅九三年落選亞姐鍾秀嫻，舊年十一月俾警方發現喺油麻地一間酒店房間內，藏有數包可卡因同麻醉劑等，佢早前喺九龍城裁判法院承認藏毒等罪名，原定噚日接受判刑，但裁判官將鍾還柙至下月十七號，待進一步索取感化官同戒毒所報告始判。
案件編號：CCC249/2005

唐季禮碌落樓梯縫五針
唐季禮原本噚日去演藝人協會嘅記者會，不過佢前幾日唔小心喺北京屋企跌親，搞到要縫針，暫時唔可以返香港。記者同唐季禮通過電話，佢話北京屋企鋪咗雲石地板，上樓梯時唔小心撞到雲石尖角位，搞到碌咗落樓梯，隻腳腫晒，入院縫咗五針，醫生話要休息一個星期後先可以返香港。