資金繼續流入炒人民幣，銀行又出現水浸現象，不過港股成交動力仍欠奉，恒指升至13800便回頭，收市報13750，升56點，成交僅122.4億元。
中國財險（2328）早前延布業績，自然惹來市場揣測業績有問題，並有大戶大手沽貨，令股價受壓。結果公司去年盈利大幅倒退逾86%，打碎晒市場人士的眼鏡，股價昨一度挫10%至2元，收報2.05元，跌7.8%。
華晨（1114）則是繼中國財險後，另一隻業績差爆鏡的股份。華晨早前曾發出盈警，之後不少證券行將其盈利預測調低至3至4億元人民幣，但華晨近期股價回穩，昨收1.32元，升0.76%。收市後，華晨派成績表，盈利竟大跌95%至4857萬元人民幣。早前高盛話過，華晨最少值1.32元，睇怕今日華晨幾難守得住呢個水平。阿虎估計唔少證券行會以華晨透明度低為理由，叫投資者大舉出貨。
最近掀起IDD減價戰的和記環球（757），噚日獲高盛睇好，話會見0.60元。股價隨即被炒高8%至0.475元，成交達5376萬元。
獲玩具大王入股的康健國際（8138）夠晒鑊氣，噚日再升53%，收0.132元。康健股價由3月15日的0.043元（停牌前報價）炒高至噚日的0.132元，比起玩具大王的入股價高出2.57倍，唔知會否有人沽貨獲利呢？不過，黑客話暫時使驚，因為今次是認購新股，須由股東會通過，相信距離沽貨獲利仍有一段很長的時間，隻股或會繼續炒。
廣州藥業（874）周三公布全年業績，若以中國會計準則計算，首三季純利大跌68.68%至4100萬元人民幣，第4季表現可能會更差。但噚日股價突被炒高13%至2.375元，成交有成3061萬元，可能有消息跟尾。
阿虎