博鰲論壇，煲呔又攞彩，事關「真司長見賈主席」（真司長乃前財政部長項懷誠所講，佢去年笑稱曾蔭權係真司長、唔係假司長，莫非當時已收到風？），獲賈慶林當眾誇獎，同阿董被人訓斥查找不足，真差天共地。
講開博鰲，本來請埋財政司司長去，不過唐唐話要閉門準備預算案辯論，所以唔去喎。呢個藉口都幾得體，唔通話費事去戥人高興咩。講開唐唐，政界老友就話，佢其實一樣可以採取「忍辱偷生鬥長命」嘅策略，只要霸住財司個位，好多嘢可以做，財司實際嘅權力非常大，甚至可以動用外滙基金，特首都要畀面，財團又要買怕，何況中央成日話要搞經濟，開正佢個瓣。只要唔亂咁買車，兩年後、或者七年後，未必唔係唐家天下。
傳真︰2623-9278
電郵︰[email protected]