上星期五，本欄反對香港接手舉辦二○○八奧運馬術賽，認為係勞民傷財，冇商業利益，亦冇體育利益。香港只得幾百人玩馬術，觀眾更少，搞嚟做乜？反而民政事務局資助傷健策騎協會（RidingfortheDisabled），更有益有建設性，因為好多基層傷殘人士想透過騎馬嚟做心理、身體治療，苦無機會也（因求過於供）。
一位消息人士（姑稱之為馬術Ａ）睇完左丁山所寫，擒擒青打電話嚟：「乜你會反對呀？唔好啦，你有所不知，呢次係香港嘅報答機會，中央批准自由行，帶旺晒零售業與舖位，啲珠寶金飾界、數碼電子產品界、化妝品界，好應該集體捐番幾億元畀香港主辦二○○八年奧運馬術賽，報答中央之恩。中國一來冇馬匹檢疫系統，二來冇馬術人才，三來完全冇主辦大型馬術，應付三百隻馬嘅經驗，由北京搞，死梗，所以中央先至授意香港接手，由北京奧組委包底，以免中國失禮世界。香港第樣唔叻啫，講到馬咯喎，香港馬會叻到震，全世界都知，國際馬術協會都信服㗎！」
如果係咁，點解國際馬術協會（FEI）反對由香港接手？馬術Ａ話：「據我聽到，國際奧委會全力支持，但FEI條氣唔順，佢哋認為（一）北京自知唔掂，為何申辦奧運時唔講清楚；（二）呢幾年來北京冇做過工夫，引入完善馬匹檢疫系統；（三）北京要拖到最後一刻先至話自己唔掂，要交波畀香港；（四）南韓代表話八八年漢城奧運，南韓政府為咗馬術賽，大刀闊斧，在比賽場地方圓五里之內，下令不准有任何動物，以免傳染疾病，害親啲馬，漢城得，點解北京唔得？會上北京代表不能提出有力反駁，只係話趕唔切做，所以FEI委員好勞氣，國際奧委會其實支持中國建議嘅，但為免太霸道，於是延期再議，下次再開會，我敢講，香港極有機會舉辦二○○八年奧運馬術賽！」