由特區政府主辦嘅五一國際勞動節酒會，年年都喺五一勞動節當日舉行，但今年「煲呔」打骰，唔知係咪新人事新作風，竟然首次將酒會推前兩日至四月二十九號星期五中午舉行，聽講政府呢一着搞到啲工會唔係好happy，當中唔少重係左派工會㖭。
原因係佢哋認為政府今次打破咗同工會一路建立嘅默契，而且呢啲工會本身都有舉辦五一酒會，政府突然改期，令到佢哋搞嘅Party同政府撞到正，最離譜係唔少工會中人本身都有工作在身，叫佢哋喺非假期出席政府嘅酒會，即係難為佢哋啫。八方於是致電追問政府發言人點解要喺今年搞搞新意思，起初發言人解釋話將酒會提前舉行係順應部份嘉賓嘅意見，過多一陣就補飛話由於五月一號當日係選委會補選投票日，為咗方便選民當日投票，所以酒會要讓路咁話，哦……即係講到底有人要為自己嘅特首大業鋪路。
傳真︰2623-9278
電郵︰[email protected]