獨立宣言:$5,000租部屋

獨立宣言:$5,000租部屋

炒樓係大人遊戲,冇成本食大茶飯嘅後生仔女,惟有租樓。據地產商所講,年輕租客除咗鍾意去租冇雷公咁遠的西貢村屋,近期重有唔少人租旺區,貪熱鬧、就腳。

記者:馬慶武 攝影:陳盛臣、陳智良、馬慶武
Models:Ricky、Chrissie、Lo(D8)

租盤資料

地點:西貢新景台某村屋2樓
面積:600呎(開放式)
租金:$4,500

西貢村屋$4,500

利 環境清靜好寫意
西貢村屋比市區平租,地方略大,多數人係貪呢度遠離煩囂,環境清靜。喺西貢住咗兩年村屋嘅阿子話:「之前住過荃灣、西灣河、西環等地方,覺得西貢的好處係環境舒適清靜,放假最寫意。」

弊 出市區唔就腳
阿子話:「開放式間隔最好用,唔可以揀太隔涉嘅地區,好似南圍就太唔就腳,呢度近市中心,落街買嘢都方便。最緊要係出市區的小巴由市中心開出,去到南圍已經客滿,冇車返工就要預多啲時間。」

近期推介
地點:蠔涌村村屋2樓 面積:300呎1房1廳
租價:$2,800
特點:距離市中心8分鐘車程,面積細,價錢較低。
查詢:美聯西貢分行94820460?29271388

■住西貢娛樂唔多,所以會有更多時間幫間屋扮靚。

■阿子更在村屋的外牆塗上壁畫。

銅鑼灣部屋$5,000

利 返屋企即瞓
「揀旺區中心住的人,大部份都係貪方便!」搬咗來銅鑼灣時代廣場對面舊樓已一年的李小姐話,住旺區真係好方便,好多時玩到三更半夜,朋友們重要捱成粒鐘車返屋企,佢就已經沖完涼上床瞓着覺,地方就腳,重多咗朋友上嚟探訪。而且舊樓的租唔算貴,$5,000已經租到400呎兩房一廳單位。

弊 嘈到要報警
不過住喺呢類旺中最旺的地段,除咗條街24小時都有人聲車聲外,2、3、4樓的樓上舖重引來大量陌生人出入。「一梯兩伙,諗住會靜啲,點知樓上樓下都夜夜笙歌玩到嘭嘭聲,最勁一個星期要報兩次警投訴。」所以李小姐覺得住旺區嘅人多數比較自私,而以前就住開大坑,啲人就斯文啲、親切啲。

租盤資料
地點:銅鑼灣羅素街某大廈6樓(時代廣場對面)
面積:400呎(兩房一廳)
租金:$5,000

■擁有自己的空間,又可以隨時招呼親朋返屋企玩,好多後生仔女一有能力就搬出來自己住。

■羅素街夜晚一樣熱鬧,落街買嘢食嘢行街都咁方便。

■李小姐話住喺度,最正就係可以睇晒時代廣場的Show。

■房間唔算大,李小姐要拆咗門換珠簾,DIY的裝修係搬出嚟住嘅最大樂趣之一。

近期推介
地點:銅鑼灣怡和街維景軒
面積:260呎至550呎
租價:$5,000起(現僅餘部份$6,500)
特點:服務式住宅,包全屋電視、家具及家居清潔服務,免費傳真機、影印機、洗衣乾衣機及健身房設備。
查詢:28908810

地點:油麻地廣華街仁安大廈8樓
面積:150呎套房
租價:$2,900
特點:面積細但包廁廚,每間套房有獨立門及鐵閘
查詢:通達物業23882088?60897179

專家教路揀租盤

通達物業鄭先生:「喺旺區租樓最緊要留意吓大廈進出人士複唔複雜,有冇管理員。如果係旺角,更加要問清楚大廈內有冇色情場所。」

美聯物業
告士打道分行胡小姐:「灣仔同銅鑼灣位置差唔多,但租金就灣仔平好多。銅鑼灣好多舊樓地下都係食肆,衞生環境可能較差。」