曾爵士去到海南島，出席博鰲會議，可能心情大靚，一隻穿花蝴蝶咁，政協主席賈慶林，亦好睇爵士台戲，召見爵士及特區精英，雖然擺出個款，重係班主任見小學生咁，但眉開眼笑，一片歡樂，點似得幾個月前，壽爺在澳門訓斥董政權咁殺氣嚴霜！
呢啲就係政治現實咯！難為當日廢董受訓斥，重夠膽歪曲事實，話中央阿爺，冇對佢不滿，反為對佢嘅工作高度肯定㖭！今日睇番轉頭，睜眼講瞎話，侮辱市民基本IQ，真係得啖笑！
曾爵士大事裝修前港督府，有消息講，唔係等兩年至入去住，而係嗱嗱臨就搬入金鑾殿！前港英時代，乜都講名正言順，名份呢樣嘢揸得好正，有咁大個頭，當然要戴咁大頂帽，何必假意謙讓呢？
可能係咁，啲土共就更加唔開心，覺得爵士重返前港督府，直頭等於英女皇回朝！一名老左朋友，私下同八方講：「其實我哋愛國同胞，唔係真係咁仇恨啲港英餘孽，嗱，好似前民航處長樂鞏南，夠係餘孽咯，不過人哋日日破口大罵港英、陳太、民主派，重搶繮過我哋老左，呢嗱，連民主派四君子上深圳同喬曉陽對話，喬老爺明明話唔介意有不同意見，但樂鞏南在台下依然大罵民主派，若然煲呔學足佢咁，我哋愛國同胞咪收貨囉！」
唉，咁又好難嘅！爵士打過港英工，但佢嘅品格高尚好多，離職以來唔唱衰前度僱主，何況佢一直平步青雲，冇受過肥彭陳太等人排擠，所以唔會因私怨懷恨在心，表現又點會咁狂躁呢？或者因為咁，壽爺先至睇中佢呢？
前港督府個名一度被竄改為「禮賓府」，將來煲呔搬入，佢係附屬「主」人，重「賓」乜嘢府呢？崩崩聲，大吉利是，唔怪得廢董要崩潰喇！前港督府睇嚟好快又會徵求改名咯，叫做「蔭權居」好，定係「曾爵樓」呢？全港市民，不妨發揮民主，多多提吓意見吖！
傳真︰2623-9278
電郵︰[email protected]