雖然受加息影響，但香港人對炒樓的熱情仍然紅火。屋村師奶與麻雀腳齊齊組團掃貨，炒樓由市區炒到入新界，睇啱邊度重有水位，就即刻飛身撲入，執輸行頭慘過敗家。𠵱家入市嫌太貴？其實未遲！一眾炒家已經睇中今年九月開幕的迪士尼樂園，趁住東涌樓市尚未起飛，火速入市！
記者：邵超、馬慶武
攝影：陳盛臣、楊錦文
Model：YoYo（D8）
豪宅勁升搵到笑
西九龍炒翻天，外地明星尚格雲頓買君臨天下執千幾萬，凱旋門正在熱搶中。其他名人歌星繼有周潤發、楊千嬅、古天樂等等，全因入市豪宅賺到笑。
尚格雲頓
04年4月買入
君臨天下相連單位
買入價8,588萬
估計市價１億2千萬
周潤發
04年4月買入
嘉珀山頂樓連空中花園
買入價4,680萬
估計市價6,600萬
古天樂
04年10月買入
京士柏山獨立屋
買入價6,600萬
估計市價7,250萬
02年1月買入
京士柏山獨立屋
買入價3,300萬
估計市價4,500萬
楊千嬅
03年11月買入
赤柱富豪海灣獨立屋
買入價3,600萬
估計市價5,000萬
凱旋門轉手即賺
近日話題作凱旋門，摩天閣天際獨立屋早前創全港分層豪宅呎價31,300元售出。造就是次買賣的中原地產高級客戶經理鍾淑麗說，三個月來向買家多番分析機鐵九龍站物業前景，終於令買家認同九龍站具九龍新地標優勢。加上不少商家經常出埠公幹，九龍站可提早一日Check-in，第二日就可以兩手空空搭飛機。而凱旋門日前再次錄得二手成交，該名投資者以868萬元買入，不足7天內，帳面獲利152萬元，非常和味。
機鐵沿線路路發
現時係人都知機鐵沿線物業有錢執，但九龍站物業在凱旋門效應帶動下，現時平均呎價逾萬元，已非普通用家負擔得起。美聯物業助理區域經理陳惠玲表示，近期奧運站物業平均呎價約7,000至8,000元，青衣站約5,000元，東涌約3,000元，同樣機鐵沿線，青衣和東涌一站之隔，就相差好多錢。
迪士尼帶旺東涌
即使呎價去到3,000幾元，東涌當炒的私人樓，包括映灣園、藍天海岸、海堤灣畔和東堤灣畔，仍然屬於低水樓，吸引愈來愈多的炒家殺入東涌。120餘萬的單位已成絕響，現時追近200萬，部份更逾200萬。
全因迪士尼效應，屆時一眾工作人員及航空公司增聘職員都會集中東涌或機場附近租樓或置業，投資自住皆宜，東涌樓市前景一片美好。還有纜車、「昂坪360」等項目，炒家正是睇中未來的東涌，將會是一個興旺的旅遊點。中原地產東涌助理分區經理林少禮更說，日前更有買家投資3千萬掃入全層8伙映灣園。
九成五按揭推高樓市
近期的炒樓熱，銀行亦是推波助瀾的「幕後搞手」。皆因買樓可以按足九成五，重有現金回贈（滙豐和恒生已取消該優惠），暫時以亞洲商業銀行提供的優惠最吸引。以過百萬元樓計，合資格的申請人最高可享有P-2.75%利率及1%的現金回贈。所以即使有加息壓力，但幾萬蚊首期就可以玩東涌、青衣樓，都幾吸引㗎！
吳小姐（炒家）
賣出單位：映灣園低層
呎數：648平方呎（兩房）
買入：130多萬
賣出：185萬
「出邊樓貴啲，就算有升值潛力，但風險又大啲，現在我買映灣園2至3個月就賺咗幾十萬。其實當初無諗過炒，係炒就買一房細單位同三房大單位，一房100萬樓現在賣180萬利潤更高。或者買嚟放租，啲空姐好捨得畀6,000幾元租。現在東涌星期六、日好熱鬧，好多人去大佛、郊外野餐，遲啲迪士尼開埋，重有水位執……現在想買藍天海岸，可以玩九五按揭，最方便入市。」
黃先生（業主）
單位：映灣園高層
呎數：1,080平方呎（三房）
買入：270萬 市值：約324萬
「一期當時售價偏高，高層大房A室或H室至可以執50萬以上，𠵱家賣一定有人承接。但本身是自住，等迪士尼開幕後，多咗人嚟東涌，應該重有水位升。嚟緊機場會起會展，重有昂坪纜車，又話起醫院，等好價啲先至放。」
李小姐（炒家，不願上鏡）
賣出單位：映灣園5座中高層E室
呎數：722平方呎（兩房）
買入：193萬（05年1月）
賣出：208萬（05年4月）
「投資開東涌，之前一手買入藍天海岸，賺咗70萬。1月買咗三間映灣園，幾個月就賺十幾萬，睇好東涌多基建，近迪士尼同機鐵站，市區同呎數賣得好貴，呢度穩陣啲，租客質素又好。」
東涌街坊賣唔賣？
青衣用家多
如果手頭上較緊，又想搵快錢，青衣的青怡花園和翠怡花園樓齡超過10年，尺碼唔大，買來投資都是不錯的選擇。當然手頭鬆啲，就不妨玩吓藍澄灣。
美聯物業分行高級營業經理樊志聰：「翠怡一個中高層單位，01年尾160萬入，摸175萬，之後再摸190萬，最後再摸192萬，同一個單位摸4摸，證明睇好有水位。」
中原地產青衣分行經理楊尚文：「區內用家與投資者比例為8比2，上個月開始多咗啲區外客嚟買樓。𠵱家翠怡花園和青怡花園都可以搵到120幾萬的樓。」
筍盤推介
單位：翠怡花園五座高層E室
呎數：572平方呎（兩房）
買入：183萬（99年）
叫價：173萬
賣點：高層，靚裝修，樓與樓間有充足空間
業主劉先生：「住開青衣唔諗東涌，見樓價升番，想樓換樓換返同區，暫時睇中藍澄灣，濠景、盈翠每呎高到4,600-4,700元，唔使諗。」
單位：青怡花園六座低層A室
呎數：432平方呎（兩房）
買入：108萬（05年1月）
叫價：125萬
賣點：發展商稱八成實用，但其實超過八成，間隔是正，現時放盤的業主正在執緊裝修。
近期新盤
君傲灣180萬上車
將軍澳君傲灣即將於下周進行內部認購，先推三分一即五百伙，由於百多萬可上車，現時已累票800張。該盤鄰近將軍澳站，兩房、三房單位共有十八種圖則，多樣化的選擇吸引上車客和換樓客。
水藍天創東涌高價
豪宅有市場，藍天海岸二期水藍天的41座獨立式花園洋房，預期園景呎價逾8,500元，海景呎價逾9,000元，81號屋以東涌高呎價9,300元預留成交。
荃灣爵悅庭交通方便
五月初推的爵悅庭東爵軒，平均呎價5,500元，一年定息按揭吸引。鄰近荃灣西鐵及地鐵站，入機場方便，受機場租客及迪士尼員工追捧。
