德國籍樞機主教拉青格喺短短兩日就順利當選做新教宗，好多人都跌晒眼鏡，八方日前喺反釋法大遊行見到夏其龍神父（圖），佢都估要四日時間，但係佢就預咗拉青格會贏。夏神父話，佢自己想尼日利亞樞機阿林澤勝出，因為𠵱家由黑人當教宗嘅意義重大。點都好，八方覺得新教宗本篤十六世噚日都就職啦，大家睇吓佢點處理問題好過。
八方好耐冇見夏神父，原來佢又重返檔案處工作，平時就去中文大學教拉丁文。夏神父以前係天主教教會嘅發言人，𠵱家就改由容若愚做。
喺教宗約望保祿二世逝世之時，好多人都談論嗰位秘密樞機會唔會係陳日君，夏神父就話𠵱家真係冇人知，就算係都唔出奇，因為胡振中就係樞機，香港補番一個都好正常。
傳真︰2623-9278
電郵︰[email protected]