以型人夜蒲為賣點嘅觀塘潮流商場apm，試業至今啱啱一個月，果然吸引一批夜遊客，專程落去八吓個新場，點知失望而回，原因個場重係試業初期，只有半數舖頭開咗，而且啲食肆話就話開到凌晨兩點，但其實好多十二點前已經收檔或者lastorder，搞到好多夜鬼失晒預算。
蘭西噚日喺apm記招嗰度，見到新鴻基屋邨管理部副總經理馮秀炎，就捉住佢問清楚，佢話，首先要多謝捧場，因為舖頭開張初期，好多細節要執，到下個月初，全線零售商舖就會開到半夜十二點，至於食肆，就會去到凌晨兩點。
佢重話，到下個月五一黃金周期間，就有近八成舖頭開張，包括吉之島超市、戲院、主題公園等，預計人流由𠵱家平日十二萬、假日十八萬，飆升到二十五萬人次。
尖沙嘴星光大道，今個禮拜五起，定期舉行「莎薩舞之夜」，每個月最後一個星期五晚上七點至十點，喺星光大道上，都會有莎薩舞街頭派對，喺拉丁音樂之下，一眾舞林高手大跳特跳，遊人除咗可以欣賞到專業舞者嘅舞姿，重有即場教授，齊齊學吓基本舞步，大家一齊玩番晚。
以往，莎薩舞街頭派對，多數喺中環蘭桂坊舉行，甚至有部份團體租借酒店ballroom搞課程，星光大道開幕後，地方空曠啲，重有維港夜色做背景，跳呢類街頭舞，就更加自由奔放。
喺好多香港人心目中，香港地產市道反彈，澳門樓市如日方中，大陸就更加係有待開發嘅寶地，地產代理再一次成為熱門行業，亦係搵快錢嘅地方。
美記話，地監局數字顯示，到三月底為止，持牌代理，已經去到接近萬九人，比舊年一月，增加接近三成，今年之內，有機會突破兩萬。
既然愈嚟愈多人想入行，美記計劃，今年大搞招聘會搵新血，最近一次係上周六喺港澳兩地同時進行，近一百五十人應徵，中港澳三地職位都有人表示興趣，當中重包括唔少碩士生。
互動教學，樂趣多，聽電視廣告聽得多，相信揼低書包多年嘅成年人，都好難親身感受得到箇中理念，不過，原來互動教學嘅精神，都可以應用喺大人世界裏，祥益最近就用咗一套互動教學方式，去訓練新人，除咗一般嘅講解授課之外，新人會以小組討論形式，分享經驗同埋提問，加強投入感，聽講，學嘢都學得快啲。
祥益重搞咗啲專為新人而設嘅獎項，包括「最快獨家」同「最靚獨家」，搵到最快最齊料獨家盤嘅新人，就有獎狀，而意外驚喜係，公司獨家盤倍增。
電郵地址：[email protected]