環保團體長春社噚日搞咗個環保行，請咗好多高官同政黨中人出席，好似冬姨、三個現任同埋前任嘅民主黨主席李永達、楊森同埋李柱銘，重有話煲呔曾上位靠運嘅民建聯蔡菜子，一齊行山籌款。不過冬姨一早就話唔會行足兩公里長嘅栢架山自然徑，重話老人家行山有壓力㖭。結果冬姨真係行咗短短十分鐘就返轉頭，坐AM車（政府車）走人。
環保行嘉賓之一、商台節目主持人蘇施黃見到冬姨縮沙，即刻話冬姨同蔡菜子對波鞋好新淨，一睇就知佢哋唔係行山嘅材料。蔡菜子即刻反駁話之前對鞋行爛咗，先着對新鞋行山。至於冬姨就冇反駁，只係笑笑口舉高隻腳畀人睇。八方睇過冬姨對鞋，都幾殘舊，但係唔係因為行山行到殘就唔知啦！
傳真︰2623-9278
電郵︰[email protected]