郭晉安、胡杏兒、黃泆潼、江芷妮、馬國明一班《同撈同煲》演員噚日去咗將軍澳新都城中心宣傳，着晒懷舊服大玩「馬姐歡聚大笪地」，藝員鬥夾麥牙餅，又幫現場觀眾駁髮梳辮，安仔同杏兒將手巾仔綁上觀眾嘅辮子上面扮馬姐，重教現場觀眾如何扮出馬姐神韻，場面惹笑。
演員在玩遊戲之餘又唱出劇中主題曲，雖然現場已經有工作人員舉晒貓紙，佢哋只係咪嘴，但點知郭晉安、胡杏兒、江芷妮同馬國明猛咁望住都唔曉得夾嘴形，係咁甩嘴，當然最後大家都係以笑遮醜啦，杏兒之後就話：「平時唱開嘅係精華版，今次係加長版，我都未試過咪嘴咪得咁過份，但登台嗰陣，我就唔會咪嘴，盡量唱現場。」
另外，杏兒本來喺今年有計劃喺九龍塘區買豪宅，但因為樓價不斷上升，起碼要幾百萬首期，杏兒話惟有儲多啲錢再作打算。
吳彥祖同導演陳木勝前晚接受港台訪問，為電影《三岔口》宣傳，吳彥祖話若果將來套戲在電影獎項上有提名，佢就最希望郭富城榜上有名，吳彥祖話：「佢今次嘅表現真係好唔同，完全脫胎換骨咁，而我同李心潔嘅感情戲亦好浪漫，呢套唔係動作片咁簡單。為咗支持票房，朋友問我攞飛，我都唔會畀，叫佢哋自己買。」
無綫節目《香港直播》噚日喺將軍澳新都城中心舉行直話直說啓動儀式，現場觀眾可以同主持包括梁榮忠、朱凱婷、鄧景輝探討話題，其中一個話題係香港應否建賭場，有巿民作出支持聲音，不過忠仔話：「我就唔贊成，賭場始終喺澳門適合啲，不如將啲錢用嚟投資喺教育方面。」
許冠文日前接受港台訪問，講到佢已經有成十年冇出嚟拍笑片，問佢點睇周星馳？許冠文話：「我覺得佢係前輩，我係後浪囉，佢有啲嘢真係幾好笑，但有時又好無厘頭。」
許冠文遲啲就會喺紅館開talk騷，佢話到時一定會講董建華，問佢同董生熟唔熟？許冠文話：「都OK，董生個人其實幾好笑㗎。」
有線電視噚日喺中環搞咗個招聘日，諗住招募三十個台前幕後員工，吸引咗差唔多四百人面試，有唔少喺外國返嚟嘅少男少女㖭，就連參加過亞姐嘅都有，好多人都係見主播呢個職位，貪佢有得出鏡之餘，重可以四周圍去，唔使坐喺Office咁悶嘛！
張震嶽早前喺台灣為新歌《馬拉桑》拍MV，內容係講佢同樂隊Free9喺戲入面演出一場綁架案嘅片段。據知，呢首歌入面係有粗口歌詞嘅，導演為咗迎合唔同歌迷嘅口味，所以卡拉OK版本係用咗××嚟代替，到時fans可以隨自己喜好選唱「very」或者「fxxking」呢兩個版本。
