未踏入五月，街上個個都大汗叠細汗，見到雪糕雪條都已經流晒口水，不過點解呢杯雪糕滑潺潺，一啲都唔凍？睇真啲原來係嚿番梘，雖然唔食得落肚，但就可以用嚟沖個靚涼，趕走一身臭汗味。現時巿面上除咗用天然材料製成嘅番梘同香味梘之外，重有一啲奇形怪狀嘅番梘，件件都似模似樣，買嚟送畀人夠晒特別。
記者：曾靜茵
攝影：陳盛臣、周旭文
Imagegirl：Bianca
番梘做出得意造型
番梘點止要嚟沖涼咁簡單，重可以做出不同形狀及不同款式，現時更有為客人度身訂做番梘的店舖，除了可以自己揀款之外，重可以配搭不同的香味，見到佢維妙維肖的造型，真係有啲唔捨得用。
夏日涼透心
以雪糕作為造型的番梘，真實度幾可亂真，望到都已經涼透心。雪糕球可以揀選朱古力味、士多啤梨味和香蕉味，鍾意邊款悉隨尊便。
製作過程
得意奶樽仔
奶樽仔細細支好得意，雖然用咗白色做樽身，但香味則可以自己挑選，揀士多啤梨味、朱古力味甚至薰衣草味都得。
售價：$68/對 (a)
炸薯條栩栩如生
望到已經令人有啲肚餓嘅薯條梘，無論色澤和大小，都同真嘅薯條差唔多，放喺枱面，隨時整蠱到人。
售價：$58/100g (a)
搽屎上身
像真度極高的屎番梘，聞落一啲都唔臭，重帶點朱古力香味。拎上手好鬼搞笑，用嚟沖涼，真係名副其實搽屎上身，絕對係搞笑之作。
售價：$48 (a)
小雲屎屎
原本為軟雪糕番梘，只要改用雪條棍叉住，就立即變成小雲用樹枝篤住嗰嚿屎屎，認真抵死！
售價：$48 (a)
排裝朱古力
番梘以朱古力的包裝作為造型，採用橄欖油同椰子油製造，每次可以啪開一小嚿沖涼，重有朱古力味、椰子味、咖啡味同呍呢嗱味任你揀。
售價：$65/排 (e)
紙包牛油
STAR番梘，單睇包裝，簡直同喺超巿買嘅牛油一模一樣。當中加入澳洲的忍冬花製成，具滋潤、止痕功效，皮膚敏感人士亦適用。
售價：$62 (e)
天然成份唔刺激皮膚
外形趣致得意的番梘會唔捨得用，以實用為大前提的話，可以選購以天然成份作為材料的番梘，一來純天然唔刺激皮膚，重有保濕功效。有些更含有細緻的粒子幫你按摩，有助血液循環，令皮膚更幼滑。
黑色竹炭梘
黑色的竹炭梘，採用純天然成份，無添加、無着色，內含竹炭粒子，能有助帶走皮膚上的殘留污物，用後清爽潔淨。
售價：$39 (e)
地中海海藻
外形似足按摩器的磨砂梘，底部凹凹凸凸幫助按摩。梘中含有源自地中海的海藻顆粒，當中的FucusVescicoulus礦物質粒子，有助解決橙皮紋問題。
售價：$88（b）
日本檜木精華
採用日本天然檜木（hinoki）的精華提煉而成，性質溫和，當中的檜木香味具有鬆弛作用，敏感皮膚亦適用。
售價：$45（d）
天然米糠好滋潤
日本製造的米糠梘，當中的米糠成份是從玄米中抽取出來的精華，有天然保濕及滋潤作用。一包有兩件，好抵用。
售價：$10（f）
苦鹽可美肌
採用天然成份的番梘，日本製造，當中採用大豆和苦鹽製成，有美肌、護膚功效，用後令皮膚更幼嫩。
售價：$10（f）
無花果助去角質
蘊含細緻的無花果籽，可輕柔磨砂，清除老廢角質，令肌膚幼滑。而當中的柑橘花、伊蘭樹香氣，更帶來舒暢的感覺。
售價：$45/100g（c）
大麻番梘減頭痛
來自意大利的Experimenta番梘，當中加入大麻成份，用後有助減輕頭痛及失眠的情況，最適合在睡前使用。
售價：$37（b）
香味梘鬆弛神經
不同的香味會帶給人不同的觀感和反應，其中加入香薰油成份的香梘，能使人去除煩惱、鬆弛神經，再加個熱水浴簡直就是最佳享受。若果唔鍾意濃烈的香花味，亦可選擇食物的香味，就如Pizza、麵包等，夠晒特別。
櫻桃樹抗憂鬱
香氣充滿日本櫻桃樹的氣息，當中蘊含的橙花、茉莉花及金合歡精華有助抗憂鬱及紓緩情緒，另外的檸檬香薰油亦有提振心情的作用。
售價：$59/100g（c）
香噴噴食物
食物香氣護膚梘，當中有朱古力味、Cappuccino味，最特別係Pizza味及新鮮出爐的麵包味，讓人感到心情愉快。
售價：$37/件（b）
綠野仙蹤
蘊含青草味再配合獨有野菊花，帶出猶如青翠綠草的香氣。加上梔子花及薰衣草的精華，能使人去除煩惱，就像人與大自然二合為一。
售價：$45/100g（c）
日本清酒梘
由日本精煉之清酒、豆腐、米粹及海藻精華製成，清酒則可清除毛孔深處的污垢，促進血液循環。米粹及豆腐能有效美白肌膚，而依蘭、橙花及玫瑰香薰油則可提供迷人的香氣。
售價：$55/100g（c）
驅蚊去水腫
美國雅濃甘油香薰梘，當中含72%有機成份，配方溫和，用後不乾燥。加上甘油能令肌膚柔軟潤澤，其中薰衣草味具驅蚊及紓緩功效，而迷迭香及薄荷味則有助去水腫。
售價：$48/件（e）
提神薄荷梘
澳洲STAR香薰磨砂梘，清新的薄荷香味，有助提神，紓緩精神緊張，最啱捱夜工作或夜晚讀書時用嚟沖涼，用後更醒神。
原價：$70
特價：$50/一件、$70/二件（e）
售賣點
(a) FoamFactory 34210808
尖沙嘴金馬倫道7-7B號華龍大廈地下B舖
(b) Experimenta 35144098
旺角亞皆老街8號朗豪坊地庫二層16號舖
(c) LUSH 28906103
銅鑼灣百德新街27-47號名店廊地下43號店
(d) Francfranc 34273366
銅鑼灣百德新街2-20號恆隆中心2樓
(e) 永安百貨 27106288
油麻地彌敦道345號永安九龍中心5樓及6樓
(f) 吉之島10元廣場 34282138
銅鑼灣京士頓街9號家居廣場1樓