屋主兩夫婦均為外國人，可能習慣咗外國寬敞舒適的生活，喺香港都要搵番個一千六百幾呎的跑馬地單位至住得舒服！先勿論樓齡，花成過百萬裝修實在豪到痹，將三房變成兩房，加大個客飯廳，至緊要係屋企有景的地方都裝上巨型落地玻璃，馬場全景盡入眼簾，就連廁所都做埋弧形落地玻璃，夠膽的話唔落簾沖涼，哇！有冇膽量一回事，事實係，聽到已經恨死隔籬我哋呢班打工仔！
記者：梁彩燕
攝影：陳智良
Model：NorrisChan
鳴謝：香港置業禮頓山分行（29237323）
入到屋，個個都話，呢間屋係咪有人住㗎？皆因屋內大得嚟好白，白得來又好乾淨，畀人一種冇人住的錯覺。當然，都係因為屋主鍾意乾淨，而且屋企養了小臘腸狗（聽講係咪都吠咗先算，見到陌生人更甚！採訪當日亦驗證咗呢一點！）過多幾個月又要迎接小生命的來臨，點都要衞生啲嘅！再者，全屋都以白色做主調，牆身、天花板、梳化、餐椅以至飾櫃都白得可以，實在好「白不襟髒」，令人唔捨得糟蹋，咁打理的工夫梗唔慳得啦，有勞傭工了！
巧妙用燈
而四正的客廳內樓底不算高，為免加重壓迫感，照明方面都選擇在牆邊安裝燈槽，代替用射燈或吊燈。反而飯廳係宴客親朋的地方，裝上水晶吊燈有助營造華麗感，與火紅中式畫作互相輝映。重有一系列中式座枱或座地燈，影照窗外燈火及馬場夜景，真係羨煞旁人。
KingSize落地窗
全屋的落地玻璃絕對首推賣點，400幾呎的客廳，超闊超巨型落地玻璃，全馬場景致盡覽無遺。超巨超舒服的L形梳化打斜置於客廳中央，擺法獨特，起初亦令人大惑不解，原來係想遷就番個全景，所以部50吋大電視就屈就喺角落頭，就算中間隔咗個超巨茶几，仍無損偌大的空間感，窗前亦刻意留有大片空地，根本都不愁地方問題，真係擺多兩枱麻雀仍綽綽有餘！
講落地玻璃，不得不提主人房，除咗又係裝有巨型窗，原來連廁所都唔放過！弧形大窗外有樹景，成千呎老遠處就有樓景，要享受無拘無束的沐浴感覺，的確係幾考膽識，而屋主使用時究竟落唔落簾？咁就真係要睇心情啦！
情迷中式家具
客飯廳的布置實在少，雖然睡房的擺設都不多，但就有股極重的傳統中國味道，就是全靠一張訂做的木製床架，形如一個透明箱子，床框則掛有紅色吊穗作裝飾，床頭有龍鳳扎染簾布，床上則放一大堆紅噹噹咕𠱸，真係舊年代洞房咁款，睇嚟只有外國人才會鍾情中國家具及擺設到如此程度吧！
可移動的儲物櫃、床頭櫃等都以中式設計做呼應，可以同時做出不同效果。木色與白牆、白梳化及白組合櫃配搭得宜，客廳感覺略為西化，入到房撞埋紅色就變得中式。
全不銹鋼廚房
大屋真係大屋，百多呎的廚房感覺有點冷，唔係因為冇煮嘢食，而係因為全銀色的不銹鋼L形廚櫃，Cyber到暈，有款之餘亦好識揀，皆因不銹鋼易打理，油迹好易清除。而一般電器用具齊全就梗啦！最估唔到係雪櫃組合櫃旁重有個專收藏紅酒的雪櫃！呢家上等人好Pro喎！照推斷，屋主鍾意宴客應該冇花假，淨係香檳杯都有十幾二十隻就知。
地區：跑馬地東山台
面積：1,650呎
間隔：兩房兩廳
裝修連家具費：$1,000,000
