北京直擊BenQ新機晒冷會<br>QubeMP3手機五月天四方登場

北京直擊BenQ新機晒冷會
QubeMP3手機五月天四方登場

今期手機興啲乜?如果重係講百萬像素鏡頭就認真Outdated,要夠潮就梗係用手機聽MP3!不過睇功能之餘更加要睇埋外形,BenQ日前喺北京記者會上發布嘅Qube,外形已經冇得頂,四四方方唔會睇兩睇就嗌悶,而且主打MP3播放,以及130萬像素鏡頭!今次重請埋「五月天」做代言人,實行於五月齊齊登場。

記者、攝影:劉耀祥

Profile

制式:GSM900/1800/1900三頻
顯示器:26萬色/128×128像素
鏡頭:130萬像素
記憶體:內置60MB、miniSD記憶卡
功能:40和弦、MP3播放/鈴聲、收音機、JAVA、GPRS
備用時間:85-150小時
通話時間:170-300分鐘
體積:66×66×20.7mm
重量:106g

今次BenQ喺北京搞嘅發布會,一切以音樂為主,主要原因除咗新產品乃MP3手機及MP3機之外,更邀請台灣樂隊「五月天」作為代言人,所以會場內外都掛滿「Qube」及「五月天」海報,未入場已經感受到BenQ的音樂氣息!而今次新產品以內地市場為主,所以亦邀請咗全國各地傳媒,人數多達數百,令會場水洩不通!

推出日期:5月
預計售價:約$3,000

■會場外掛滿「Qube」及「五月天」海報,非常有氣勢。

■作為產品代言人嘅「五月天」,當然企定定任影。

聲靚夠清晰

外形四四方方嘅BenQQube,類似嘅手機外形有Nokia7600,不過7600玩嘅係時裝Feel,而Qube就大玩影音娛樂,兩者對象完全唔同!論手感,66×66×20.7mm嘅Qube算恰到好處,無論男女拎上手,唔會因為四四方方而覺得難拎。兼且支援換殼設計,前後殼都可以更換,用嚟襯衫都冇問題!講明播放音樂乃Qube重要任務,表現當然要有番咁上下,隨機已經有線控,就算唔用線控,機背亦都有個大喇叭,播放質素係「重質不重量」,音質相當清澈,聲量方面就唔係「拆天」咁嘈,不過已經相當足夠,聽歌啫,開到拆天咁大聲做乜!播放功能上,Qube亦交足功課,有搖滾、爵士等多種音效之外,亦都有3D音效,更重要就係有埋歌詞顯示!另外,聽歌之外亦可以聽收音機,點會再怕悶。

■前後機殼都可以更換,隨時換風格。

■隨機會有線控,功能與正宗MP3機一樣。

■播放介面簡單易明,操作方便。

■內置多種音效模式之外,更有3D音效。

130萬像素鏡頭

除咗播放MP3之外,Qube另一重要功能就係影相,機背設有130萬像素鏡頭,旁邊重有閃光燈,影相時可以啟動之外,有需要亦都可以當手電筒用,火力都唔弱!機頂設有影相掣,一如DC般操作!顯示器方面就配上1.5吋26萬色芒,不過解像度較低,只有128×128像素,睇相時就略嫌線條粗咗少少。但係記憶體方面,Qube就非常出色,內置60MB記憶體之外,更支援miniSD記憶卡,聽歌影相都綽綽有餘!由於採用四方形機身,所以聽筒位就設於機角,若果係Nokia7600用家,相信會好快適應到!

■聽筒位設於機角,新用家要適應吓。

■支援miniSD記憶卡,換卡都好方便。

■鏡頭與喇叭都放於機背,線條優美。

■機頂只有影相掣,簡單又美觀。

同場加映
Joybee220 MP3機擺上床

雖然Qube好似搶咗唔少風頭,不過會場上所擺放嘅三部全新MP3機,一樣有吸引力!當中較受注目就係Joybee220,就咁睇MP3機身好似較為平凡,不過配上個2.1聲道專用機座就即時升價十陪!內置容量未有透露,不過睇睇Joybee220喺MP3機之外,更加做埋睇相、錄音機、USB硬碟、收音機及床頭鬧鐘,相信容量都以GB計!

推出日期:6月
售價:未定

■離開機座之後嘅220,機身非常細小。

內地傳媒點樣揀?

羅小姐(廣州電視台)我會揀Joybee220,自己鍾意白色,所以一見已經好鍾意,而且聽歌亦都好方便。

Tina(廣東電視台)自己不嬲都鍾意黑色,所以我會揀Joybee720,機身又黑又銀,真係非常有型。

Joybee720 鋼之鍊MP3機

各大MP3機廠商都推出數以GB計MP3機,目的都係追住iPod嚟打,所以Joybee720都唔例外。一身鋼鐵硬朗造型,金屬質感非常強烈。不過功能上就強得多,用上彩色顯示器,以及內置5GB硬碟,可以播放MP3及收音機之外,更支援SD記憶卡,順理成章做埋讀卡器、電子相簿及流動硬碟機。

推出日期:6月
售價:未定

Joybee230 睇書睇相又聽歌

用上特大6萬5色彩芒嘅Joybee230,當然唔單止聽歌咁簡單,支援BMP、JPG、GIF及LGO多種格式檔案,所以睇相先至係Joybee230嘅職責!另外,亦支援電子書格式檔案,將Joybee230變身做電子書都冇問題。Joybee230共有128MB、256MB及512MB3種記憶體容量,支援USB2.0,過歌過相都特別快!

推出日期:6月
售價:未定