近年轉咗做時事評論員嘅李鵬飛曾經爆料，話陳方安生當年錯過一次做特首嘅機會，估唔到個機會今次畀咗煲呔曾。陳太日前公開話，佢完全冇意思參加七月特首補選，相信煲呔可放下心頭大石，因為如果中央要搵「港英餘孽」治港，陳太係唯一比佢資歷更深、民望更高嘅人。
一啲熟陳太嘅人士分析，佢唔參選原因只有一個，就係睇到中央已經屬意煲呔，就冇謂陪跑啦，倒不如繼續扮演「香港良心」嘅角色好過。
呢啲就真係時也、命也。煲呔最想光宗耀祖係人都知，佢老哥肯定為做特首赴湯蹈火，中央亦睇到呢點，不過陳太已經提佢，唔好太過份，「一接棒就釋法係一個唔好嘅開始」，呢句說話可謂正中要害，相信煲呔都識聽啩。
中央今次出奇招起用煲呔，亦係冇辦法中嘅辦法。前幾晚喺香港歡送老董晚宴上，主席尤曾家麗對住新舊老細話，希望新嘅特首要信任佢哋，真係盡在不言中。
傳真︰2623-9278
電郵︰[email protected]