在蘭桂坊碰到飲食Ｎ，佢係呢行嘅老波骨，一間蘭桂坊日本餐廳搵咗佢做顧問，時時都嚟睇場。順口問佢最近有乜好搞，佢話餐廳生意可以保持，但大氣候就認真曳，佢班行家成立咗一個叫做「飲食娛樂禁煙條例關注組」，與衞生福利及食物局講一刀切食肆全面禁煙條例，但周一嶽局長挾民意自重，唔肯再見佢哋多一次，負責草擬條例嗰位仁兄ＡＯ又因為《蘋果》頭版揭露佢涉嫌行為與ＡＯ身份不相稱，唔肯出嚟，所以呢個關注組有如老鼠拉龜，暫時唔知點入手同政府傾。
冇得傾，惟有做嘢。據左丁山向另外一位餐飲界人士索料，知道五月一日星期日晚上，油麻地一段彌敦道範圍內嘅食肆，會熄燈抗議，以示不滿，所謂熄燈，並非自己倒自己米，閉門停業，而係將大招牌、細招牌嘅燈熄咗，令呢一截嘅彌敦道少咗啲霓虹光管，比較黑暗一啲。
熄招牌，有何含義？據講用以表示，假如食肆娛樂場所全面禁煙嘅話，會有好多字號做唔住，熄燈關門炒員工魷魚，製造失業。
老實講，咁嘅象徵式抗議，斷唔會打動周一嶽局長，只會有象徵意義啫。
律師Ｋ睇過條新例，發覺唔止食肆娛樂場所受影響，所有零售店舖、封閉巴士站、公共場所都受波及，因為禁煙條例話在substantiallyenclosed場所內吸煙，就是違法。何謂substantiallyenclosed？律師Ｋ舉個例，會展正門門口（舊翼）等的士地方、新城市廣場巴士站、所有街舖、工廠寫字樓。假如五一黃金周自由行遊客買珠寶之時食煙（此乃常見鏡頭），將來就係違法；在新城市巴士站等巴士時吸煙，亦違法；在家裏吸煙，菲傭在場，屬違法……嘩，聽到左丁山頭暈，只想講一句：條例實施後，咁多同志遊客來港犯法，怎麼辦怎麼辦？