舊年經濟好轉，各大企業嘅人工都有調整，當然愈高層愈肥仔啦。好似李嘉誠大仔、長實副主席兼董事總經理李澤鉅，舊年就有董事酬金三千六百二十萬元，較○三年增加百分之四點一，繼續成為長實最高薪嘅董事。不過，佢都好君真，將喺和黃同長江生命科技收到嘅錢畀番長實。長實去年所有董事酬金總和增長百分之六點一，達一億三元，但仍不及和黃大班霍建寧去年喺和黃所得嘅一億三千七元。
除咗李澤鉅，長實重有六名董事全年酬金逾一千萬元。以升幅計，吳佳慶升幅最大，○四年有一千五百四十八萬元，升百分之十一，其中花紅佔七百三十一萬元，為眾董事中攞得最多花紅嗰個。甘慶林一千六百六十八萬元，管財務嘅執行董事葉德銓一千四百三十一萬元，成日扮鬼扮馬去sell樓嘅長實「樓神」趙國雄則為一千三百二十七萬元。至於長實主席李超人就例牌收五千元。
另一藍籌公司九龍倉，有兩位董事酬金超過一千萬，排頭位嘅介乎一千五百五十萬至千六萬元，第二位一千二百五十萬至千三萬，八方估計呢兩位應該係主席吳光正，同副主席兼常務董事吳天海。
傳真︰2623-9278
電郵︰[email protected]