唔少香港人大歎世界難撈，財經事務及庫務局局長馬時亨就話，其實𠵱家香港經濟環境，點都衰唔過三、四十年前佢後生嗰陣。噚日佢應前綫劉慧卿邀請，去到大埔同市民對話講「香港拚搏精神」，唔少中年人訴苦，話𠵱家好難搵工，馬時亨就叫佢哋自我增值學好英文，去迪士尼應徵，不過有位太太即時反駁，話𠵱家讀夜校學費好貴，中年人想增值都唔易。
馬時亨會後大講辛酸史，話細個時由於家貧成日豬油撈飯就一餐，十幾歲就曾經喺文華酒店間鞋舖做後生（即係雜工），月薪一百八十元，負責每日將客人訂做皮鞋嘅鞋辦送到工場，同時將做好嘅鞋送返舖面，當時重未有海底隧道，佢每日就喺天星碼頭上上落落過海，有時一日要搭十程八程船，夏天時更加身水身汗，搵嘅係辛苦錢。
有位市民呻話個仔讀書唔成，又搵唔到嘢做驚佢學壞，馬時亨拍心口話可以幫手教仔，話可以帶佢返教會信教，咁就唔驚學壞啦。
傳真︰2623-9278
電郵︰[email protected]