宏安集團（1222）最近一季打橫行，日線圖3條主要平均線扭埋一齊，遇有呢種走勢，通常係突變前夕，估佢爆上機會大。宏安05年度中期（09月止）賺952萬元，睇落平凡，但呢期宏安積極轉型搞地產，兼食正大浪。中期之後，宏安放售觀塘及旺角物業，大賺3000萬元，將喺05年全年度入帳。保守計數，宏安05年度純利，應該上到4500萬元，PE不過6倍幾，若維持去年度近5厘派息率，更加吸引。
再講，宏安家陣手擁13萬平方呎土儲，係咁意每方呎升值500蚊，宏安NAV已可超越5蚊，折讓擴闊到60%水位，咁嘅條件，爆上機會大增。所以，買宏安，最好長揸短炒，一手貨揸住等突破，另一手就喺1.9至2.2元水位rangetrading，咁就冇壞。
祥泰行（199）停牌幾乎成個月，上星期四復牌，若然掉頭，見0.44元水位，好撈底。祥泰行最新通告話，會發行9.56億元CB，承配人包括錦興（275）及祥泰行副主席何厚鏘。若然錦興全數兌換CB，將控祥泰行38.8%兼成新主，副主席何厚鏘亦將揸13%權益。要咁睇，錦興爆棚哥本身財技了得，加埋副主席何生係澳門特首堂弟，呢個新配搭，應該擦出好大火花。再講，祥泰行往績表現一般，呢次發CB，另外引入4名基金大孖沙，搞到咁大陣仗，未有新業務之前，已經有大孖沙肯落叠，聯想更多。
呢勻祥泰行所發CB，每股兌換價0.44元，現價較兌換價不過呈10%溢價，股價若然掉頭，更加有機會同大孖沙平起平坐，就當momentumtrade，有咁嘅鑽石陣容，風險好有限。
錢雋