風雨過後　坦承被馬太傷心
李麗珍再戰情海窮人免問

李麗珍與髮型師馬桂燦及馬太李靜婷的三角關係早前成為傳媒焦點，對於李靜婷出書爆性史一事，李麗珍坦言無法再視馬太為朋友，因為馬太令她太傷心。雖然感情路上波折重重，但李麗珍仍然期待愛情，雖然不會用金錢及外貌去選擇情人，不過她說：「但唔好窮囉，以前唔會計，但𠵱家要為個女着想，要自私少少。」

感情篇：愛過痛過　拍拖必須互相諒解
對於李麗珍來說，近年來生命中最大的打擊，莫過於馬太李靜婷去年出書大爆自己與老公馬桂燦（著名髮型師JackyMa）以及阿珍的三角關係，事件鬧得滿城風雨，李麗珍一直表現低調，究竟馬太所講所寫的是真是假，她亦不作評論。

「可能係真有其事」
李麗珍說：「我講乜嘢，啲記者亦未必會寫，所以我選擇保持沉默，可能係真有其事，但或者係另有其人呢？我都係當古仔咁睇。雖然呢件事對我打擊好大，但相比起南亞海嘯，真係濕濕碎，當時我係好唔開心，咪搵朋友傾吓偈囉。我份人好容易對人好好，但以後識朋友會小心，𠵱家來往嘅朋友都係識咗好耐嘅老朋友，我對朋友要求唔高，只需要啱傾就得，但唔係個個朋友都係（馬太）咁嘅。」

「我算對錢睇得淡」
馬太曾說仍然當阿珍是朋友，對此李麗珍說：「對朋友唔係咁嘅態度啩？令到朋友咁傷心？我𠵱家會當佢係普通人看待。」問李麗珍會否覺得馬太出書是否因為經濟壓力，她說：「如果咁樣掉番轉頭諗，我會體諒佢。」
李麗珍的感情路並不平坦，早年曾與祁文傑及雷有暉拍拖，九六年她與許愿拉埋天窗，更育有一女，可惜於○一年離婚。李麗珍挑選對象從來不以外貌或財富作為準則，她說：「靚仔喺戲入面成日合作，但係戲唔同真實，亦有好有錢嘅追過我，但大家始終click唔到一齊，我覺得生活唔係淨係為錢，我揀男友最緊要佢有啲嘢令到我欣賞，啲有錢佬有乜嘢值得我欣賞？唔通我欣賞人哋識搵錢咩！」
李麗珍續說：「我算對錢睇得淡，如果要搵錢，我有好多方法可以搵到好多錢，但我覺得做人排第一位嘅最緊要係開心，我𠵱家同以前都係一樣，鍾意有才華嘅男仔，但唔好窮囉，唔使養埋佢就得，以前唔會計，但𠵱家要為個女着想，要自私少少。」

「已經成年冇拍拖」
外界一直覺得李麗珍是一個很需要愛情的女人，對此她說：「𠵱家冇以前咁需要，我做嘢已經要掛住個女，如果掛多個會好辛苦。我已經成年冇拍拖，當然希望有拖拍，結婚就唔會再諗，我都已經結過，不過遇到鍾意嘅我會識得珍惜。初初拍拖梗係會有激情，但之後就要有欣賞同尊重，相處真係好難，要互相諒解，以前細個唔識諗，𠵱家會諗吓對方嘅感受。」