教統局局長李國章同立法會議員有唔少牙齒印，噚日佢老兄出席「饑饉三十」揭幕禮，同湯家驊、馮檢基、蔡素玉同埋曾鈺成玩尋寶遊戲時，就死都唔肯做喺模擬垃圾堆中搵食物嘅飢民，原來佢昅實做軍人嘅角色，可以揸住支水槍，猛射班尊貴嘅議員。八方見李局長一拎起支水槍就成個精神晒，陰陰笑咁係咁射，似足大細路嘅佢今次真係有仇報仇，但就難為班議員做落湯雞。
講番饑饉三十，李局長噚日就同班饑饉營友呻，話太太驚佢食得太多，每日為佢預備嘅飯盒份量都唔多夠，令佢永遠都係帶住三分飢嚟做嘢。八方事後向局長追問佢嘅餐單，原來只係得牛油果、生菜、蘿蔔絲、細蝦仔幾種食物，唔怪得之唔夠食啦，但佢話自己從來唔敢同太太詐型，唔知佢係咪驚扭耳仔呢？
傳真︰2623-9278
電郵︰[email protected]