四月九日晚到上海，同行有我兩個好拍檔劉偉強，莊文強。還有一大班《頭文字D》的宣傳人員，演員等。目的係星期天下午在上海賽車場展開的《頭文字D》宣傳活動。工作人員非常緊張，因為有好多明星喺度，明星總係令人緊張，或者係都要搞到你好緊張佢咁，同啲𡃁女冇乜分別。
但係真正令大家緊張嘅係因為宣傳隊伍內有八個日本人，包括女星鈴木杏和幾個負責表演「飄移」技術嘅日籍車手。本來就冇乜好緊張，香港電影經常同亞洲唔同地區嘅演員工作人員合作，一向都冇大問題。問題係由四月八日開始，新聞報道中國幾個城市包括上海發生反日示威，起因當然係日本政府再一次篡改侵華史實，目的係乜我唔知，結果係令到更多人記番起。
每個活動前大家都被提醒小心記者問題，鈴木杏和車手亦減少了亮相以減低被問及有關反日問題的危險。結果，上海同我細個睇《上海灘》嘅印象一樣，紙醉金迷，夜夜笙歌。完全見唔到有任可反日示威。最少新聞睇唔到。
四月十一日上海飛東京，同行仍然係我兩個好拍檔。明星陣容就改為更加令人緊張嘅劉德華同梁朝偉，目的已經變咗係《無間道3》嘅日本首映。同樣令大家緊張嘅中日關係，同樣小心翼翼處理。電視細小嘅窗框重複播放中國國內的反日示威，鏡頭內迫滿了憤怒的中國人，事件好明顯被放大咗。
首映宣傳活動順利完成，大家只講電影，其實係冇人問我，如果有人問我一定媽叉日本政府班老嘢，同好多日本人講起，佢哋都好贊成我咁做。