一本《達文西密碼》掀起全球解碼熱！《驚天奪寶》可以話食住呢條水而拍成。人人熟悉嘅美國獨立宣言同100元美鈔，內裏竟隱藏所羅門王寶藏秘密；再加勇探南極、偷國寶、盜古墓，驚險奇情，簡直有如將《達文西密碼》同《奪寶奇兵》合二為一，難怪本周一出即成3區DVD熱賣榜首。提提大家，買碟記得睇Bonus，裏面隱藏多組密碼，完全解破先可以睇足版Bonus；彩蛋與電影文題相對，果然鬼「碼」！
記者：朱崇德
熟知行情者，都知由於《驚天奪寶》今個星期落場，好多大片都要讓路，話晒佢一月初香港上畫時，首輪每日票房都迫過《功夫》落第二！至於下星期新片可以用迫爆嚟形容，暫知已有《歌聲魅影》、《非常外父生擒霍老爺》、《尼蒙利斯之連環不幸事件》，真係睇你買得邊隻；另外收到小道消息，士郎正宗起朵之作《蘋果核戰記》（$73），今個星期全新推出dts靚聲畫版，據知佢用上最新「3DLiveAnime」技術重新製作，好多碟迷都話畫面正到無倫！旺角碟舖話佢嘅銷數，好似重貼住《驚》㖭，以日本動畫嚟講，都算異數！
扮尼古拉斯基治破「彩蛋」片段
鬼佬片玩「彩蛋」，唔算新鮮，不過玩到好似《驚天奪寶》咁，一個又一個謎題重重叠，要大家好似戲中主角尼古拉斯基治，逐一偵破先睇齊所有Bonus，都算罕見；基本一開機嘅「特別收錄」，只有製作花絮、刪剪片段、模擬動畫同最初結局4項，每睇一個特別收錄就會得一密碼，最後睇完「最初結局」就會出現「密碼介面」，輸入正確就可進入第二頁「特別收錄」（包括「尋寶獵人檔案室」、「和萊利波爾一同加入解碼行動」及「聖殿騎士團」）！在這裏再玩一次「解碼」，就可以進入第三頁，並以「特殊觀看模式」睇電影！另外一提大家，所有Bonus內容，都有中文字幕顯示。如果唔想搵餐懵，可以直接Click入「主Menu」右上角的書形圖示，再鍵入三位數的「關鍵密碼」，就可以將所有隱藏片段完全開放，而密碼……就放在報紙左上角，想自己查案定馬上知到，就由自己決定啦！
故事大橋 拖歷史名人落水
好多人都知金像影帝湯漢斯正趕拍《達文西密碼》，而《驚》好明顯借橋食頭水；故事講述尼古拉斯基治嘅蓋茲家族，同樣多代守住一個有關聖殿騎士團嘅秘密，就係所羅門王的寶藏，不過由於資料不全，寶藏一直搵唔到，更成為世人的笑柄，就連家族成員都開始懷疑寶藏的真偽時，尼決定窮畢生精力，找尋真相，可惜他的行動原來一直被匪幫所監視，解破密碼漸見端倪時，背後的「黃雀」原來已久候多時！
講到同《達》最相似之處，可以話將千真萬確的歷史人物及事件盡量拖落水，華盛頓、富蘭克林等一類家傳戶曉人物，《驚》電影中都同佢哋加咗一段段野史式的演繹；不過聰明處是將《達》的小說中，大家唔多熟悉嘅藝術品、數理及神話，改為獨立宣言、美鈔圖案，務求令故事更通俗易懂，而此亦可見編劇的功力。
懸疑加動作 冇冷場
觀賞《驚》最引人入勝之處，一言概之係絕無冷場，基本笑位、動作位同懸疑位毫不間斷地出現，故事布局雖未見精細，不過已是近年少見的上品！最緊張一幕首數偷「美國獨立宣言」，簡單有力、頗合情理，再加槍戰及炮彈飛車等荷李活式驚險場面，熱鬥緊張四字都算攞足分！中尾段由獨立廳，同匪幫鬥到去聖三一堂嘅奪寶過程，虛虛實實、患得患失，再加《奪寶奇兵》式歷險過程，亦有透不過氣的感覺；自福伯唔做鍾博士後，真係久違喇！至於聲畫表現方面，畫面整體表現細緻冇投訴，聲效行滿檔DOBLYDIGITAL5.1（448kbps），感覺是最原汁原味！但記者睇完Bonus之後，導演話原本電影足版係有成近4個鐘，為上戲院就剪到個零鐘，加埋今次聲效唔行dts5.1，如果遲半年再加推Director'sCut版本，真係反枱都似！
店舖查詢：DVDPro
電話：23326326
地址：旺角奶路臣街6E德發商場地庫B4舖
