李麗珍十七歲加入娛樂圈後迅即走紅，九九年憑《千言萬語》奪得金馬影后，演技備受肯定。李麗珍自言已算好運，入行後甚少要為錢而工作，她現時已拜師學油畫，雖然以前沒有接受過正統訓練，但師傅指她有畫畫天份，她現時的心願是開一間畫廊。
李麗珍說：「娛樂圈發展順其自然啦，以前做過太類似嘅角色就唔會再做。公司啱啱幫我接咗個內地品牌嘅化妝品宣傳，嚟緊一年之內要返去三十次，去唔同地方宣傳。我希望將來可以喺娛樂圈同畫畫雙線發展，𠵱家同葉蘊儀跟同一個師傅學油畫，我鍾意畫人，佢鍾意畫花，每個星期六都去上堂，我哋希望將來一齊開一間畫廊，我覺得做女人唔好扮靚就一世，應該有目標，就係因為有咗呢個理想，我覺得我𠵱家生活得幾開心。」
李麗珍表示現時生命中最重要的是女兒，她說：「其實湊女都幾大壓力，𠵱家我星期一至四幾乎都唔會去街，好似之前曾志偉生日咁，我都係等個女瞓咗先走。就算幾攰，我都會喺朝早六點半起身，陪個女食早餐、返學。」
李麗珍續說：「生嘅時候當然冇諗到咁長遠啦，但係佢畀我嘅快樂大過晒湊女嘅壓力，尤其聽到佢學廣告話『媽咪Iloveyoutoo』，就真係冧晒。」
自從女兒出世後，李麗珍便與父母同住，就算在加拿大定居時大家亦是住在樓上樓下，提到與父母相處之道，李麗珍自言全靠一個「忍」字，她說：「老人家要體諒多啲，有時激嬲咗我，我會唔出聲，有乜嘢就打畀細妹，由細妹同佢哋講，因為我係衝動派，有嘢會嘈咗先，所以要忍住。」
撰文：張止寒 攝影：陳慧安
化妝：小白 髮型：Chin.G@Andy
場
