自PSP推出以嚟，NDS一直被睇低一線；今個星期任天堂就作出反擊，新推出嘅《任天狗》原來唔玩翻炒唔玩續集一樣可以大賣！3款《任天狗》之中，暫時以《柴犬》系列最好賣，初出賣$350都有價有市，𠵱家就約$300樓下就有交易，連帶NDS銷量都好咗。新主打嘅NDS顏色，主機市價都係$1,050左右，行貨初版銀色主機重$1,000唔使，買嚟𠱁吓女朋友都值得。講真好多舖頭都寧願賣NDS，起碼唔使畀客試成個鐘頭「死點」嘛。
神話破滅《一年戰爭》滯銷
一直以嚟，高達一年戰爭嘅遊戲都係銷量保證，今次BANDAI拉埋NAMCO翻製嘅《高達一年戰爭》，更以銷量百萬隻為目標。可惜密密翻炒嘅結果，當然被消費者所遺棄。日本秋葉原發售首周已跌落港幣$250有找！香港𠵱家賣$210左右，重有限量嘅年曆贈送，見到都一泡眼淚！講真遊戲本身唔差，不過之前廠商實在玩高達條橋玩得太密，導致今次出現史上名作最快冧價事件。
行、水PSP鬥價戰
PSPGame行貨批發價同建議零售價出咗之後，水貨Game即時插水，大部份4,800日圓嘅遊戲，港幣$300已有交易，相信行貨推出之後，水貨同行貨鬥價應會更厲害。而行貨PSP遊戲除定價$299外，亦會配上3區中文包裝，部份遊戲更會同時引入日、英文版，不過3區UMD影碟暫時未有推出日期。