中記舊年以一億五千五百萬、每呎約六千，買入上環信德中心三十六樓，諗住今年做總部。現總部喺中環新世界大廈，今年約滿。不過，聽講隨時有變，中記兩邊都傾緊續約，傾得掂，就唔搬住，幾年後再算。
信德嗰層，逾兩萬五呎，因有海景，租畀人可以收到二十幾蚊呎，同新世界總部差唔多。中記中人話，信德一層過自用，夠歸一，但始終唔夠中環就腳，而且新世界租緊四萬五千呎，大啲，佢哋大部份唔想搬。
信德件貨入咗之後，一直有客洽購，但俾老施拒絕，𠵱家應該升值唔少。信德東翼三十四樓剛易手，成交價一億九千八百萬，咁中記嗰層升值幾多，有數得計。
樓市轉旺已有一段時間，各類物業中，仍以豪宅最旺，難怪代理都特別落力，拓展豪宅分行網絡。港置噚日就喺堅道，開咗西半山第二間分行，想積極進軍豪宅市場。
豪宅買家要求一向較高，港置今次開舖落重本，準備優惠畀買家。即日起，首名經堅道分行，買五百萬以上單位嘅，送一站式家居優惠，好似禮物籃一樣，執齊按摩椅、電視同家庭影院組合，送畀買家，總值八萬八千八。
尖沙嘴凱旋門七十八個單位，今日賣畀新地會會員，過去五日接受會員登記認購，按登記次序，今日下晝揀樓，新地話，收到一千個認購。不過，聽講新地會好積極，猛咁打電話，call啲會員去登記。
市場人士話，發展商噚日額外派咗六個單位畀代理推銷，係朝日閣同映月閣高層，呎價八千五至萬四，統統賣晒。
呢個創出樓市神話嘅豪宅盤，自從上個禮拜開賣，不斷有新買家搵貨。中記嚴永強話，映月閣中層E室一房，五百三十呎，業主上星期用四百零五萬買入，啱啱以四百五十萬賣出，賺咗四十五萬，超過十一巴仙。𠵱家大概有一百五十個放盤，叫價一般比買入價加一至兩成。
北望神州係全大勢所趨，仲量聯行酒店集團開始加強內地業務，北京辦事處，由五位雙語流利嘅成員，提供諮詢、可行性研究、投資銷售、酒店經營者評選和磋商，同埋估價和策略研究等服務。
仲量聯行話，各地酒店經營者，一般都好想知道，喺二○○八年舉行嘅北京奧運會，對當地酒店市場究意會有乜嘢影響？
經過仲量聯行探究過去五屆喺不同國家搞嘅奧運會，發現幾個主辦城市嘅樓價，喺奧運會嗰年，無一例外都會「明顯上漲」，但係喺隨後嗰幾年，就會逐步回軟。
不過，仲量聯行估計，因為之後北京重會有其他國際盛事舉行，所以預期房租嘅回落速度會較慢。
根據仲量聯行嘅資料，今年頭兩個月，北京五星級酒店嘅入住率約為五成六，平均房租約為一百二十美元，即係大概九百三十六港元。
電郵地址：[email protected]
