人民幣又起炒風，真係要多得格老言論，佢斷言中國為解決中國經濟失衡問題不得不調整滙率，結果資金再流入香港炒作，令拆息回軟，銀行調低定存利率。噚日港股再升96點，恒指收13693，成交177.66億元。
不過大家唔好忘記溫總的「出其不意論」，即係話中國會與炒家鬥氣，一有熱錢炒作，人民幣就唔會升值，直至熱錢撤退才有機會變動滙率。睇嚟熱錢只會流出流入，想押中人民幣升值則比較難。
人民幣有炒作，國企股亦有運行，國企指數升1.25%至4708。其中廣深鐵路（525）勁升6.12%至2.60元，中興通訊（763）升5.7%至23.15元。公路股深高速（548）及江蘇寧滬（177）各升3.7%。
瀚智（516）繼續炒獲注資消息，早前股價只屬乾升，吸引唔到散戶注意。噚日股價勁升70%至0.124元，不再是乾升，有1927萬元大額成交配合，似乎有料到。
嘉華建材（027）雖然話派出街嘅貨唔多，但復牌後沽壓仍然頗大，滙證及瑞銀曾於8元水平力守，但好快就退守至7.40元，股價重一度跌至7.35元，好彩經過一輪震盪後終見反彈，最後報7.75元，跌幅收窄至9.57%，成交達15.9億元。黑客話，經此一震，相信貨源已徹底歸邊，噚日沽壓主要來自先前高追投資者的止蝕沽盤。嘉建早前宣布收購銀河娛樂後復牌，當日股價曾升至11元，唔少人在10元接貨。
有份競投新加坡賭牌的新世紀（234）表明建議已被拒絕，新濠（200）則未有公布，反彈逾3%至19.75元。
阿虎