年頭炒低PE高息工業股時，幾乎隻隻都有得賺，但最近炒工業股就似乎冇咁得心應手，好多時就算公布業績靚，但股價一樣冇反應，好似剛於前日公布全年業績的聯泰（311）盈利超過招股書預測，但股價並無大反應。
聯泰剛公布截至去年12月全年業績，盈利有成2.37億元，比去年上升28.83%，亦較上市時預測的2.2億元為高，兼派末期息4.056仙，但股價噚日升唔夠1％，收3.125元，成交股數30萬股，金額94萬元。
經紀黃話，聯泰去年業績好，唔代表今年繼續好，由於美國方面已經表明唔滿意中國紡織品傾銷，好大機會有措施制裁，令紡織製衣股蒙上陰影，因此就算聯泰去年業績靚，但股價仍然無法炒上。
聯泰股價由去年最高位的4.70元，一直回到𠵱家的3元水平。
另外一隻盈利上升但股價下跌的工業股，就係利民實業（229），隻股全年盈利上升47％，但股價一樣不濟。經紀黃話，只要睇清楚盤數，就知利民盈利並非來自核心的製造業，而係來自重估投資業務，本業表現只是一般。
慕容小初